Dili, 09 Janeiru 2025 (Média Democracia) – Komunidade Aldeia Fomentu 1 rekoopera ho estadu daudaun ne’e kontinua sobu sira nia uma atu desloka ba Munisípiu maibé husu ba estadu tenke prepara kondisaun di’ak
Tuir komunidade Fomentu 1, Januario da Silva hateten, hela iha area risku Fomentu 1 durante tinan 14 resin ona tanba nesesidade mak obriga maibé hanesan povu ba ria ida ne’e prontu koopera ho estadu atu halo Dili sai sidade di’ak iha futuru
“Ha’u hanesan sidadaun Timor-oan prontu koopera ho estadu maibé triste de’it muda ami povu aileba nia oan la ho kondisaun ne’ebé dignu. Ami prontu atu hadia rai ida ne’e tanba iha tempu uluk mós ha’u nia inan aman sira luta mós ba rai nia libertasaun hodi ukun rasik aan.” Dehan Januario da Silva
Nia hatutan rai ne’e libertasaun ona ema hotu atu moris liberdade maibé realidade povu nafatin terus tanba governu muda povu husi fatin ida ba fatin seluk la ho dignu hodi prejudika ba labarik sira nia futuru
“Ami hakarak desloka ba Munisipiu maibé husu ba governu prepara transporte nune’e lori ami ba to’o iha ami nia fatin. Ami mós ejiji ba estadu tenke halo rekopensasaun aseleradu ituan tanba ita haree ba kondisaun agora tempu udan ida ne’e fó impaktu mai ami liu-liu ba labarik sira.” Dehan nia
Nia salienta durante hela iha area fomentu 1 ema hotu mai ho familia simples moris toos ho natar bazeia de’it ba raihenek mota laran. Maske durante hela iha area refere sempre infrenta risku oioin maibé nafatin fiar malu halo bronjon nune’e hodi satan mota boot to’o agora maibé estadu deside halo eviksaun hanesan povu prontu rekoopera
Iha fatin hanesan Xefe Aldeia Fomentu 1 suku Comoro Postu-Administrativu Dom Alexo Munisipiu Dili, Luis Camoês hateten, uma-kain ne’ebé hetan despeju hamutuk sia-nulu resin-rua 92, papulasaun sira hamutuk atus lima resin ne’ebé eviksaun husi estadu sei desloka ba Munisipiu iha tempu badak nia laran
“Daudaun ne’e komunidade sira komesa sobu ona uma tanba iha tinan kotuk estadu liuhusi Sekretariu Estadu Asuntu Toponímia Organizasaun no Urbana SEATOU no Autoridade Munisipiu Dili halo ona levantamentu uma-kain ne’ebé iha area risku nia laran ba Aldeia tolu hanesan Fomentu I, Fomentu II no Moris Foun.” Dehan Xefe Aldeia Fomentu 1, Luis Camoês
Nia hatutan tanba durante ne’e komunidade sira hein hela karta notifikasaun legal ruma husi estadu nune’e komunidade sira bele hatene data fiksu nune’e bele prepara-aan ho di’ak antes sai husi área risku hodi desloka ba Munisípiu
Esplika liután katak hanesan Autoridade Lokal lori komunidade nia naran sente preokupasaun tebes tanba komunidade barak mak lakon sira nia servisu liu-liu ba labarik sira ne’ebé durante ne’e tuir hela prosesu aprendizajen tanba desloka familia ba Munisípiu entaun oan sira sente preokupa boot tanba durante oan sira sempre garantia ba inan aman
Reportajen : Nelfiano
Foto : Nelfiano