Vietnam, 17 Setembru 2025 (Média Democracia) – Ministru Negósiu Estranjeiru no Kooperasaun, Bendito dos Santos Freitas ho delegasaun, hala’o enkontru bilateral ho Ministru Negósiu Estranjeiru Repúblika Sosialista Vietnam interinu, Le Hoai Trung, hodi hato’o Governu Timor-Leste profundu agradesimentu ba apoiu tomak durante prosesu adezaun ba ASEAN, iha Hotel Pan Pacific Sidade Hanoi Vietnam. Informasaun hirak ne’e Média Democracia hetan husi Via-Whatsapp Media Officer MNEK.
Vizita Ministru Bendito Freitas nian ba Vietnam ne’e, atu prienxe kritériu ida husi Ministru Negósiu Estranjeiru Malázia hanesan mós Prezidénsia ASEAN 2025, hodi hato’o Timor-Leste nia profundu agradesimentu ba estadu-membru ASEAN sira, ba sira-nia apoiu ne’ebé fó ba Timor-Leste tantu iha apoiu tékniku no polítiku iha prosesu preparasaun atu sai membru ASEAN ba dala-11 iha fulan outubru.
Nune’e mós vizita refere sei reforsa liután kooperasaun bilateral entre Timor-Leste no Vietnam iha post-adezaun ba ASEAN. Durante enkontru, Ministru Bendito Freitas expresa ligasaun bilaterál ne’ebé forte ho Vietnam, tanba Vietnam nu’udar nasaun ne’ebé iha esperiénsia kona-ba konstrusaun estadu no koñesidu mós hanesan paíz ida ekonómikamente vibrante nomos 33o. lugar ekonómiku iha mundu.
Ministru hateten, presiza aprende mós esperiénsia husi Vietnam iha área reforma jestaun administrasaun públika, reforma setór ekonómiku no governasaun.
Diskusaun ne’e mós foka ba futuru estabelesimentu mekanizmu kordenasaun polítika entre nasaun rua, nune’e kooperasaun bilateral ne’ebé iha, bele estruturadu no orientadu ba área espesífiku hanesan investimentu no seluk tan.
Ministru Bendito Freitas hateten, Governu Vietnam deklara sira-nia prontidaun tomak ba Timor-Leste nia adezaun ba organizasaun rejionál ne’e desde Timor-Leste hato’o ninia aplikasaun formal iha tinan 2011.
“Ohin loron ita-nia vizita ida mai ita simu konfirmasaun husi MNEK Interinu katak, sira prontu tebes atu servisu ho ita iha áreas oi-oin liu-liu iha nível ministerial atu haree kona-ba prioridades ne’ebé sira bele halo ho ita entermus intervensaun konjunta atu nune’e bele lori benefísius mai ita.” Dehan Ministru Negósiu Estranjeiru no Kooperasaun, Bendito dos Santos Freitas
Xefe Diplomata ne’e esplika, ASEAN hanesan grupu rejionál ida-ne’ebé forte no karaterizadu fortemente iha setór ekonómiku, tan ne’e, bainhira Timor-Leste sai membru ona ASEAN, sei intensifika liután kooperasaun ho Vietnam iha área hanesan polítika-seguransa, ekonomia no sósiu-kultura, inklui mós setór sira ne’ebé ligadu ba dezenvolvimentu teknolojia, siénsia, edukasaun, saúde no seluk tan.
Iha enkontru ne’e mós, Ministru Negósiu Estranjeiru Vietnam interinu Le Hoai Trung, husu atu Governu Timor-Leste ho Vietnam bele servisu besik liután, nune’e iha pos-adezaun bele iha koordenasaun ba atividade ekonómika, polítika-seguransa no sósiu-kultural bazeia ba pilar importante tolu ASEAN nian.
Entretantu, enkontru ne’e, Ministru Bendito Freitas akompañadu husi Embaixadór Timor-Leste ba Vietnam, João Pereira, Diretora-Jerál ba Asuntu ASEAN, Elisa da Silva no Diretór Nasionál ba Sudeste Aziátiku, Vânio Florival, iha Hotel Pan Pacific Sidade Hanoi Vietnam.
Reportajen : Domingas
Foto : Media Officer MNEK