Dili, 08 Janeiru 2025 (Média Democracia) – João dos Santos idade haat-nulu resin-lima (45) husi Aldeia Aitoi, Suku Namalesu, Postu-Administrativu Liquidoe, Munisipiu Aileu, daudaun ne’e hela iha merkadu Taisibesi, atividade negosiu loron ne’ebé hala’o mak la’o ain husi taibesi ba to’o Kristu Rei hodi fa’an ai-fuan tuir dalan
João informa katak, durante leba ai-fuan sira hahu ho idade sanulu resin-lima (15), to’o ohin loron tanba de’it atu responde ba familia nia nesesidade loron-loron nian no liuliu ba oan sira nia futuru.
“Ha’u leba ai-fuan sira ne’e hodi fa’an iha sidade Dili hahu ha’u sei idade sanulu resin-lima (15) to’o ohin loron. Uluk ha’u seida’uk hela iha Dili entaun la’o ain husi Liquidoe hodi mai fa’an iha Dili no dader tenki sai madrugada iha oras tuku 4:00 to’o iha Balibar komesa rai loron ona tanba dalan ne’ebé ha’u liu ne’e lais no korta deit hodi tun mai sidade Buka moris. Karik ai-fuan ne’ebé ha’u fa’an mak la hotu sedu entaun ha’u mós tenke fila tarde iha tempo kalan. Ai-fuan ne’ebe fa’an ne’e hanesan hudi, sabaruka, uvas, ainanas no seluk tan, ai-fuan sira ne’e ha’u hola tutan fali husi ema seluk mak ha’u fa’an hikas fali. Aifuan sira ne’e ho presu $1 ou $2, no osan hirak ne’ebé hetan hodi hola netik hahan no balun rai hodi selu oan sira nia eskola.” Dehan João iha Cristu Rei Dili.
Nia Salienta liután katak maske senti moris ne’e todan nafatin luta ba moris hodi bele hetan netik osan rahun, lao-ain bebeik husi Liquidoe mai Dili senti kole ona tanba ida mós ba bebeik ona nune’e nia deside hodi hela iha merkadu Tasibesi hodi kontinua leba Ai-fuan perkore sidade Dili.
“Ha’u nia idade mós aumenta ba bebeik nune’e atu la’o dook mós la forsa ona entaun ha’u deside hela fali iha merkadu Tasibesi hodi kontinua leba Ai-fuan hodi bele perkore iha fatin ne’ebe mak rame, no ha’u fahe tempu iha loron segunda to’o sexta ha’u perkore iha jardim no tasi-ibun sira hanesan, Largo Lecidere, Jardim motael, jardim 5 de maio no tasi ibun Kampun Alor. Loron sabadu no domingo ha’u kontinua fa’an iha Cristu Rei ho area branka.” Dehan Nia
Nia esplika tan maske moris ne’e difisil tebes tanba de’it lakohi oan sira nia halerik ba hahan no osan, nu’udar aman ida sai xefe família tenki servisu makas hodi bele responde netik oan sira nia nesesidade tanba oan hamutuk na’in lima (5), hodi bele kontinua sira-nia estudu iha ensinu sekundária no universidade.
Reportajen : Tomas
Foto : Tomas