Dili, 14 Janeiru 2025 (Média Democracia) – Iha Suku Comoro iha aldeia haat hetan ona numeru xamada husi Sekretariu Estadu Asuntu Toponomia Organizasaun no Urbana (SEATOU) maibé aldeia rua mak sobu ona hanesan Fomentu I no Fomentu II
Tuir xefe suku Comoro Elizio da Silva Marçal hateten, populasaun Fomentu I total uma-kain hamutuk 92 nafatin koopera ho governu hodi sobu rasik uma durante loron tolu nune’e bele prepara atu transporta ba ida-idak nia Munisípiu
“Ita koalia kona-ba Aldeia Fomentu I, SEATOU halo xamada durante loron tolu, nune’e hodi fó espasu ba komunidade sira bele sobu rasik sira nia uma no bele aproveita netik sasan balun hodi desloka ba ida-idak nia munisipiu ne’ebé ho total uma-kain hamutuk 92 iha Aldeia Fomentu I total papulasaun sira hamutuk 540 ne’ebé durante ne’e hela iha Aldeia refere.” Dehan Xefe Suku Comoro Elizio da Silva Marçal
Nia hatutan uma-kain ne’ebé rejistu husi aldeia Fomentu I atu desloka ba Munisípiu ho total hamutuk 62 governu bele prepara netik transporte nune’e komunidade afetadu sira bele desloka ba ida-idak nia Munisípiu hodi hala’o sira nia atividade hanesan baibain
“Populasaun uma-kain 62 iha aldeia fomentu I rejistu ona hodi hein transporte ne’ebé sei prepara husi governu hodi desloka ba ida-idak nia Munisípiu. Aleinde ne’e iha uma-kain hamutuk 42 mak transporta ona ba Munisipiu sei hela uma-kain 20 mak sei hein transporte atu desloka ba Munispiu, populasaun ne’ebé barak liu husi Munisipiu ermera,Oe-cuse, Bobonaru no Viqueque.” Dehan nia
Nia afirma populasaun ne’ebé desloka ba Munispiu sira fila mai Dili tanba barak mak servisu hodi fasilita ba nesesidade loron-loron nian inklui haree oan sira nia estudu
“Iha populasaun barak mak la ba Munisípiu tanba balun iha rai rasik iha area ne’ebé dook husi area risku no populasaun balun iha familia ne’ebé oferese rai ba sira bele halo uma, nune’e hodi asegura sira bele hela hodi buka moris iha Dili.” Nia haktuir
Nia informa husu ba governu liuhusi Sekretariu Estadu Asuntu Toponomia Organizasaun no Urbana hamutuk ho Ministeriu Obras Publiku iha tempu badak nia laran sei tau tanda ba uma-kain iha aldeia moris foun tenke hamutuk ho autoridade suku nune’e bele koopera ho komunidade sira servisu hotu sei lao ho di’ak
Esplika liután katak Suku Comoro Aldeia hamutuk sanulu-resin-haat iha aldeia tolu mak daudaun ne’e hetan eviksaun husi SEATOU tanba okupa fatin risku hodi fó impaktu ba vida, no tuir planu iha aldeia moris foun parte mota ninin iha tempu badak nia laran kada-uma sei hetan risku/tanda husi Ministeriu Obras Publiku ne’ebé servisu hamutuk autoridade suku Comoro.
Reportajen : Nelfiano
Foto : Nelfiano