Dili 07 Outobru 2024 (Media Democracia)– Centro Nasional Chega,IP servisu hamutuk ho Universidade Nasional Timor Lorosa’e liuhusi Faculdade Siensia Sociais hala’o Workshop ho tema ” Hatene istoria, ita bele evita erru ne’ebé hanesan.” Workshop ne’e hala’o iha auditorium Faculdade Siensia Sociais, Caicoli Dili
Iha abertura Decano Faculdade Siensia Sociais, Alarico da Costa Ximenes, hatete lori Faculdade nia naran husu agradese ba iha Centro Nasional Chega ne’ebé hili ona Faculdade Siensia Sociais hodi mai realiza atividade iha ne’e importante tebes tanba oinsa bele lori estudante sira atu ba hatene kle’an liután kona-ba istoria Timor-Leste nian
“Hanesan Decano husu ba estudante sira liu-liu ba finalista sira bele aproveita dia-diak materia sira nomos sesaun sira ne’ebé orsida sei hato’o husi formadór sira liuhusi materia hirak ne’e bele hasa’e imi nia koñesementu kona-ba istoria Timor nian nomos imi bele hatene di’ak liután kona-ba istoria hirak ne’e”. Dehan Decano Faculdade Siensia Sociais, Alarico da Costa Ximenes
Nia hatutan espera katak husi sesaun ida ohin too lokraik imi bele aproveita dia-diak materia hirak ne’ebé fó husi formador sira liuhusi sesaun hirak tuir mai nomos dala ida tan nafatin agradese ba CNC espera katak sei servisu hamutuk di’ak liu iha futuru. Faculdade prontu atu servisu hamutuk ho CNC iha tempu saida de’it haree ba estudante sira.
Iha Sorin seluk Diretor edukasaun no informasaun CNC.IP, Alexandre Ornai Pinto, hatete atividade ohin ne’e hanesan sesaun ida ne’ebé organiza husi Chega no Embaixador sira programa sira ne’e kria iha CNC atu oferese programa sira ne’ebé sistematika liubá foinsa’e sira ne’ebé hala’o sira nia estajiu profisional iha Chega no sira mós ajuda servisu sira iha CNC programa ne’ebé sira bele implementa hanesan daudaun ne’e realiza formasaun programa hirak ne’e ba estudante finalista sira.
“Programa ohin ne’e importante tebes tanba ita atu fahe kona-ba istoria ne’ebe akontese iha tempu uluk nomos esplika kona-ba masakre sira ne’ebé akontese iha tempu uluk. Ami hala’o iha ambitu sira hanesan ne’e iha ezebisaun ba iha filme, hatudu Fotografia, ne’ebé tuir mai halo reflesaun kona-ba filme nomos diskusaun relasiona ho programa refere.” Lia hirak ne’e hato’o husi Diretor edukasaun no informasaun CNC.IP Alexander Ornai Pinto
Nia hatutan esperansa husi atividade ne’e bele ajuda joven liu-liu ba iha estudante Universidade sira bele hatene di’ak liután kona-ba istoria Timor-Leste nian hahu husi 1974-1999 tanba iha konteudu Ensino Secundario ne’e barak liu la hanorin kona-ba istoria Timor nian tan ne’e Liuhusi sesaun sira hanesan ne’e bele hasa’e di’ak Liután joventude sira nia koñesementu istoria Timor nian.
Esplika kle’an liután kona-ba atividade ne’e hala’o husi Centro Nasional Chega,Ip partisipa maximu husi estudante Universidade UNTL liuhusi Faculdade Siensia Sociais hamutuk na’in lima-nulu 50 nomos dosente sira, iha atividade ne’e sei formasaun kona-ba istoria Timor nian husi tinan 1974-99.
Reportajen : Domingas
Foto : Estefania