Dili, 26 Fevereiru 2025 (Média Democracia) – Arsebispo Arkidioseze Metropolitana Dili, Dom Virgílio Cardeal do Carmo da Silva, husu sarani iha teritóriu Timor-Leste atu halo orasaun ba Sua Santidade Papa Francisco Papa nia Saúde atu rekupera lalais husi moras Pneumunia.
Santu Padre nia komdisaun saúde todan oituan maibé médiku sira fó esperansa katak sei bele rekoopera.
“Hanesan ita hotu hatene nia situasaun tuir ita hotu nia haree katak nia moras ne’ebé todan oituan, maibé médiku sira fó nafatin hela esperansa katak sei iha rekooperasaun.” Dehan Dom Virgįlio ba jornalista sira iha edifísiu Konferénsia Episkopál Timorense, Bidau Santa Ana Dili Tersa ne’e (25/02)
Dom Virgílio Cardeal do Carmo da Silva husu, nu’udar sarani ne’ebé iha ligasaun ida besik los ho Amu Papa, proximidade ida ne’e, iha esperiénsia fulan hirak liubá hodi Sua Santidade nia vizita ne’e, halo Timor-oan sente besik los ba Amu Papa.
Sua eminênsia dehan iha situasaun difisíl ne’ebé dadaun Amu Papa ne’e konvite ida ba sarani katólika atu reza ba nia saúde.
“Konvite ida ba ita sarani sira atu reza ba nia, ema ida-idak iha tersu, iha família, misa sira ne’ebé ida-idak nian, ita-nia kolen, ita-nia susar, ita-nia malirin sira ne’ebé loron-loron ita lori, buat sira ne’e mak sai hanesan sakrifísiu ne’ebé ita mós bele oferese nu’udar karan ida ba maromak hodi liuhusi karan ida ne’e ita husu atu na’i Maromak bele hakman no tulun atu médiku sira bele hetan meius ne’ebé di’ak liu hodi bele rekoopera lalais Amu Papa nia saude.” Nia hateten
Tanba ne’e Arsebispu husu ba sarani hotu atu hamutuk ida-idak halo orasaun hodi reza, fiar katak ho orasaun na’i Maromak bele hatan ba halerik no preokupasaun sira ne’e.
“Iha Timor seidauk iha hanoin atu reza hamutuk iha igreja, tanba servisu ida-idak nian ne’ebé seidauk to’o atu halibur ema hotu, tanba mós ita haree kuandu tempu udan, buat hirak ne’e hotu, ita iha misa dader-dader ita toman ho buat ne’ebé família ida-idak iha, ha’u hanoin ita enkoraja ita fiar maske ita labele mai hamutuk nu’udar komunidade boot ida atu selebra misa iha katedral maibé ne’e hakarak enkoraja atu família ida-idak atu reza iha família, dader iha misa, iha igreja sira.” Dehan Arsebispo
Enkuantu igreja seidauk iha inisiativa halibur hamutuk hodi reza, tanba liga ho situasaun agora udan, buat hirak ne’e hotu la’ós fasil atu halibur sarani barak iha fatin ida, maibé Kardeal fiar katak Timor-oan hotu reza, tanba ne’e nia hakarak enkoraja iha família, iha igreja, iha komunidade no parókia ida-idak ho nia meius rasik atu bele halo orasaun ba Santu Padre.
Papa Francisco, dezde Sesta (14/02/2025) to’o agora sei halo hela tratamentu ba nia saúde iha Hospital Gemelli, Roma, tanba sofre moras Pneumonia iha nia pulmaun, ne’ebe rezulta nia kondisaun kompleksu oituan.
“Antes ne’e Papa Francisco susar dada iis kauza husi moras Bronkitis no infesaun polimikroba, ne’ebé halo nia kondisaun grave liu. Papa Francisco agora daudaun hetan tratamentu antibiotiku no ho terapia.” Nia hatutan
Enkuantu Vatikanu kansela hotu ona ajenda ofisial Papa Francisco to’o semana oin hodi bele garante nia kondisaun, nune’e bele rekoopera lalais.
“Maske Papa Francisco hasoru problema oin-oin relasiona ho nia saúde dezde 2021 hanesan hernia, intestines (tee-oan boot), no moras iha nia ain tunur ne’ebé halo nia tenke uza kadeira roda.” Kardeal Konklui
Papa Francisco hatudu forsa nafatin ba nia-aan no husu sarani Katoliku iha mundu, reza ba nia iha faze susar hanesan dadaun nia hasoru iha situasaun refere.
Reportajen : Estefania
Foto : Estefania