Dili, 20 Marsu 2025 (Media Democracia) – Asosiasaun Jornalista Timor-Leste (AJTL), servisu hamutuk ho Oxfam iha Timor-Leste halo lansamentu ba boletin Média Tour kona-ba “Kampaña no Advokasia ba Justisa Klimátika” ne’ebé AJTL hamutuk ho jornalista sira tun ba kobertuta iha terrenu hodi haree direta situasaun komunidade iha baze durante sira hasoru justisa klimátika iha sira-nia moris.
Contry Director Oxfam Timor-Leste Pankaj Anand hateten, iha tinan kotuk AJTL halo servisu barak hodi ba kobertura iha Munisípiu tolu inklui Raeoa, ne’ebé sira-nia servisu ne’e importante tebes tanba Timor-Leste hanesan nasaun demokrátiku.
“Papél média ne’e importante tebes, sai hanesan pilár ida edifikasaun demokrasia ne’e rasik, espera katak informasaun sira ne’ebé rekolla iha forum boletin ne’e bele sai hanesan informasaun ida importante ba desizaun politiku sira ne’ebé halo polítika, ba reprezentante organizasaun sosiedade sivil no akadémiku sira hodi nune’e bele uza sira hanesan meiu ne’ebé importante.” Dehan Country Director Oxfam Timor-Leste (19/03/2025)
Nia dehan impaktu negativu husi mudansa klimátika ne’e afeta tebes Timor-Leste, ida ne’e la’ós Timor-Leste nia sala maibé dala ruma ema seluk mak halo no ikus Timor-Leste tenke sofre konsekuensia sira husi alterasaun klimátika ida ne’e.
“Luta hasoru impaktu negativu husi mudansa alterasaun klimátika ne’e la’ós entidade ida nian mesak, ida ne’e hanesan konvite ba parte hotu, sosiedade sivíl, akademia no seluk tan atu nune’e bele hahú luta ida ne’e, ho lansamentu ofisiál kampaña advokasia justisa klimátika ida ne’e dala ida tan hatudu mai ita katak, ita hotu presiza luta atu nune’e bele hasoru impaktu negativu husi alterasaun klimátika.” Nia dehan
Iha biban ne’e Embaixadór Mudansa Klimátika Timor-Leste Abrão Barbosa haktuir, atividade lansamentu ne’e atu fó informasaun kona-ba justisa klimátika ne’ebé AJTL ho jornalista sira halo peskiza no rejultadu refere prodúz ba livru hodi sai matadalan ba sira ne’ebé foti desizaun.
“Ohin halo lansamentu para dokumentu sira ne’e ita uza ba ema sira ne’ebé foti desizaun, ne’e konsidera dadus hodi halo planu ba iha área mudansa klimátika nian liuliu ba iha adaptasaun no mitigasaun nian no bele hatan ba lakunas sira husi afetadu impaktu mudansa klimátika ne’ebé lansamentu kampaña ne’e kapás los atu bele konsidera karik, bele oinsa ita promove justisa klimátika iha nivel hotu-hotu.” Nia haktuir
Nia hatutan katak boletin ne’e barak liu atu bele fó informasaun ba malu liuliu oinsá hatan ba halakon estragus ne’ebé mosu husi mudansa klimátika, oinsá halo adaptasaun hodi bele hasa’e relijilensia iha komunidae nia leet ne’e, no oinsá país sira hatun sira-nia emisaun gas estufas para bele salva guarda planeta mundu no kresimentu ekonómiku nomos vida sosial ninian.
Iha fatin hanesan Prezidente Asosiasaun Jornalista Timor-Leste Zevonia Vieira hateten, lansamentu boletin média tour ne’e liga mós ho halo kampaña kona-ba justisa klimátika ne’ebé programa refere hetan apoiu husi Oxfam Hongkong no kolabora ho Oxfam Timor-Leste.
“Tanba sa ita lansa, tinan kotuk to’o fulan fevereiru tinan ida ne’e AJTL kolabora ho Oxfam iha Timor hodi halo media tour ba Munisípiu tolu inklui Raeoa, hamutuk hodi halo kobertura kona-ba impaktu mudansa klimátika ba grupu vulneravel sira inklui feto, ema ho defisiénsia no grupu marjinalizadu sira seluk, ferik no katuas, iha ne’ebá estudu kazu ne’ebé jornalista sira halo ne’e identifika kona-ba impaktu mudansa klimátika krize bee.” Dehan Prezidente AJTL ba jornalista sira iha edifísiu Oxfam
Impaktu mudansa klimátika ne’e halo feto barak mak kuru-bee ho distánsia ne’ebé dook nomos fó impaktu ba grupu agrikultura hanesan kafé nia kualidade tun no prodúz istória kona-na joven produtivu sira ne’ebé uza sira-nia matenek lokál hodi halo debu ka konservasaun bee hodi ajuda komunidade sira ne’ebé la asesu bee, atu fasil ba sira hodi hetan bee iha sira-nia hela fatin.
Nia informa lansamentu boletin média tour ne’e, atu artigu ne’ebé jornalista sira prodúz husi televizaun, radiu, jornál nomos digital news ka media online sira nia istória ne’ebé sira hetan husi entrevista fontes, nune’e prodúz hamutuk iha média boletin tour hodi lansa, entaun boletin ne’e sei entrega ba governu atu governu uza ba sira-nia dadus oinsá buka solusaun ne’ebé di’ak atu responde ba problema sira ne’ebé komunidade sira hasoru iha area rural.
Prezidente AJTL ne’e afirma katak tinan ida ne’e Oxfam ho AJTL iha komitmentu kontinua nafatin halo média tour ba Munisipiu sira seluk, la’ós de’it Lautem, Ermera , Baucau inklui Raeoa maibé Munisípiu sira ne’ebé ita sei identifika hamutuk, nune’e kontinua lori jornalista sira ba área rural hodi foti prekupasaun husi komunidade sira.
“Identifika istória feto nian, joven nian no agtikultór sira ne’ebé moris iha área rural nomos ba sira ne’ebé la asesu merkadu, tanba faktor estrada-at impaktu husi udan boot no osan la iha atu hadi’a iha área remotas.” Nia afirma
Entretantu prezidente ne’e relata katak AJTL sei lori tan jornalista sira hamutuk ho Oxfam atu kee istória lubuk barak ne’ebé seidauk konsege hetan no kontinua fó sai lian komunidade sira ne’ebé média seidauk to’o iha ne’ebá atu kobre no AJTL tenta atu esforsu-an para fó espasu ba komunidade sira atu ko’alia.
Reportajen : Estefania
Foto : Estefania