Dili, 31 Marsu 2025 (Média Democracia) – Komunidade Musulmanu iha Timor-Leste selebra loron Idul-Fitri ho Perdaun, ksolok, dame no fraternidade, hafoin halo jejun durante fulan ida nia laran hodi bele tahan-an to’o ohin loron.
Prezidente Konsellu Fundasaun An-Nur Abdullah Said Sargaran hateten ohin komunidade Musulmanu selebra Idul Fitri hanesan loron determinadu ba Komunidade Musulmanu hodi selebra vitoria durante fulan ida resin, ida ne’e hanesan luta boot ne’ebé atu hasa’e fé ba maromak.
“Objetivu husi jejum fulan ida ne’e mak atu elojia ema ida-idak nia fiar ba maromak, liuhusi jejum mós atu prova sentidu profunda ema ida-idak nia ba Maromak, hodi hasae ita-nia kapasidade fé ba nai maromak hodi hatudu simplesidade katak jejum hanesan sakrifisiu ne’ebé ema fó ba nia komfiansa ba nai maromak.” Dehan Prezidente Konsellu Fundasaun An-Nur Abdullah Said Sargaran
Nia hatutan idul fitri hanesan selebra Vitoria tanba luta durante fulan ida nia laran, konsege to’o ohin loron selebra loron Idul Fitri ne’e, husu atu reza ba nai maromak fó perdua ba sala hotu ne’ebé durante ne’e halo.
“Ita tenke iha Toleransia ba malu, haree malu di’ak, tuir mensajem ne’ebé Amu PAPA hato’o mai ita tenke iha fraternidade humana iha rai laran, ami komunidade musulmanu mesmu ami minoria maibé ida ne’e ami sei tau atensaun di’ak, ita bele haree iha ita-nia rai laran desde uluk kedas nunka abitua komflitu razaun de reliziaun no ita nafatin hatudu respeita ba malu hodi hatudu exemplu di’ak ba futuru.” Dehan nia
Nia salienta iha ambitu independensia bele hasae tan atu mantein nafatin fraternidade, amizade atu nune’e bele fó liman ba malu hodi harii nasaun ida prosperu liután iha futuru. Prosperu ida ne’e hanesan komunidade religiozu iha Timor-Leste maioria Katolika maibé bele tau liman hamutuk, prosperu hanesan objetivu iha mundu ne’e.
“Ha’u hato’o parabens ba maluk musulmanu sira hotu, tanba ita luta durante ita hetan vitoria agora ita iha Idul-Fitri nia laran, ne’eduni saida mak imi hetan durante treinamentu iha fulan ramadan ne’e tenke nafatin iha imi nia-an atu aplika ba moris, iha komunidade nia laran, komesa husi ida-idak nia familia to’o ba komunidade sira, atu bele fó exemplu di’ak ba komunidade ida-ne’e.” Nia informa
Iha fatin hanesan komunidade musulmanu Isac Diroma hateten, hanesan komunidade musulmanu iha Timor-Leste sente komtente tebes-tebes tanba ohin selebra loron Idul-Fitri iha koslok no dame nia laran
“Selebrasaun loron Idul-Fitri ida ne’e laos akontese de’it iha loron ida-nia laran, maibé ida ne’e prosesu naruk durante fulan ida-nia laran liuhusi dejun no tahan ita-nia-aan husi han, hemu no tolok, nune’e bele abitua ita-nia-aan husi hahalok aat durante ita halo mai to’o loron ida ohin ne’ebé sente haksolok tebes-tebes tanba ultrapasa difikuldade sira hotu.” Dehan Komunidade Musulmanu Isac Diroma
Nia hatutan idul fitri durante fulan ida-nia laran atu treina-aan husi hahalok-aat sira ne’ebé la di’ak no koko atu abitua, nune’e selebrasaun loron ida ne’e simu paz no estabilidade iha ema ida-idak nia-aan rasik
“Ha’u nia esperansa ba futuru oinsa atu mantein no esforsu ba buat ne’ebé ita hala’o durante fulan ida nia laran, oinsá ita bele sai sidadun ne’ebé di’ak no respeitu inan aman hatudu maneira ne’ebé di’ak no furak liu iha sosiedade nia leet.”Dehan nia
Esplika liután tinan ne’e komunidade musulmanu hala’o selebrasaun loron Idul-fitri nian rihun-ida atus-haat haatnulu resin-neen (1446). Aleinde ne’e selebrasaun ba loron Idul-fitri komunidade musulmanu partisipa maximu husi kapital Dili inklui Munisipiu sira. Kada tinan sempre selebra loron Idul-Fitri dala ida no sei jejun durante fulan ida-nia laran, ida ne’e mak lala’ok fiar komunidade musulmanu nian.
Reportajen : Nelfiano
Foto : Nelfiano