Dili, 04 Abril 2025 (Média Democracia) – Governu Xina liuhusi Embaixada Xina entrega ambulánsia tolu ba Ministériu Administrasaun Estatál, enkuantu Doasaun ne’e mai husi Provínsia Hunan, Repúblika Populár Xina.
Reprezentante Embaixada Xina iha Timor-Leste Xu Danyang orgullu partisipa iha serimónia entrega formál ambulánsia ba governu Timor-Leste, nia mós agradese ba Ministériu Administrasaun Estatál, Ministériu Saúde no Munisípiu Manatutu ba apoiu kooperasaun lokál no saúde entre nasaun rua.
“Nu’udar realizasaun ikus liuhusi kooperasaun provínsia Hunan no Munisípiu Manatutu, amizade husi povu Xina ba Timor-Leste, kooperasaun ne’e relasaun entre Xina no Timor leste iha progresu boot nia amizade entre provinsia Hunan no Munisípiu Manatutu sei besik liután.” Dehan Xu Danyang iha ámbitu serimónia entrega ambulánsia iha resintu MAE Caicoli
Nia informa katak iha fulan kotun Ministru Administrasaun Estatál Tomás do Rosário Cabral lori prezidente Munisípiu nain hitu (7) iha Timor ba vizita provínsia Hunan, no iha loron tuir mai Primeiru Ministru Xanana sei lidera delegasaun ida hodi vizita fali provínsia Hunan.
Nia dehan Kooperasaun provínsia sai hanesan destake ida husi kooperasaun entre China ba Timor-Leste iha área oin-oin.
“Doasaun ambulánsia ne’e hanesan hatán ba nesesidade urjente povu Timor nian nomos reflete Xina nia apoiu ba tempu naruk no firme ba dezenvolvimentu kuidadu médiku Timor-Leste nian, hein katak viaturas sira ne’e bele ajuda hasa’e nivel atendimentu médiku iha Munisípiu Manatutu.” Nia dehan
Embaixada Xina sei kontinua servisu makas ho Ministériu Administrasaun Estatál no Ministériu Saúde ho Munisípiu Manatutu hodi promove rezultadu ne’ebé boot liután iha kooperasaun saúde provinsiál no lokál entre nasaun rua ne’e.
Iha fatin hanesan Ministru Administrasaun Estatál, Tomás do Rosário Cabral haktuir, Apoiu ne’e uluk asina ona akordu ho atuál Primeiru Ministru Kayrala Xanana bainhira sei iha kna’ar hanesan Prezidente Repúblika.
“Akordu amizade ne’e mai kedas antes 2008, mai ita-nia komunidade iha ne’ebá mós presiza hela no sira asina primeiru akordu ne’e ho Primeiru Ministru hanesan testamentu, depois ho Autoridade Munisipiu sira, momentu ne’ebá sei distritu labele iha asina memorandum ho liur.” Dehan Ministro Tomás Cabral
Nia haktuir Ambulánsia tolu ne’e simu iha Outubru tinan kotuk ne’ebé doasaun ne’e husi povu provínsia Hunan Xina ba iha povu Munisípiu Manatutu.
“Agora Autoridade sira iha Munisípiu mak tenke jere ema-nia apoiu ne’e tanba sira sei mai bebeik haree, dehan katak ita uza duni apoiu ne’e ho didi’ak ka lae, ha’u aproveita kedas iha ne’e Autoridade sira ne’ebé atu simu kareta ne’e modernu oitoan ida ne’e mak ID blue, aimoruk ida iha ne’e tenke ense iha kareta.” Nia haktuir
Nia mós husu ba Ministra Saúde atu téknika sira fó koñesimentu ba ambulánsia referea tanba viaturas ne’e mais eletrónik oituan, tan ne’e téknika sira bele hanorin oinsá utiliza.
Ba oin Ministru Administrasaun Estatál sei propoin ba provínsia Hunan bele halo alargamentu mós ba Munisípiu balu, aleinde ne’e sira-nia téknika na’in neen (6) dadaun ne’e iha hela Manatutu, hodi apoiu ba área agrikola nia iha Natarbora.
“Ekipa ida mai husi Hunan sei ba vizita fali Manatutu ba liu kedas iha Repor ne’ebá, oinsá atu halo interkámbiu amizade, programa ida ne’e sira apoiu mós iha área agrikultura ba produsaun, tanba ne’e mak povu Manatutu rasik halo amizade tenke sira dezenvolve mós sira-nia aan.” Nia dehan
Governante ne’e agradese ba Embaixadór China nia reprezentante, liuhusi kooperasaun ne’e ba oin nafatin bele ajuda mós Munisípiu sira seluk, nune’e bele lori objetivu ba povu nia moris di’ak.
Iha biban ne’e Prezidente Autoridade Manatutu Luis Fernandes realsa katak, Munisípiu Manatutu ho Hunan iha kooperasaun iha seitór barak, primeiru ajuda iha seitór agríkola, iha fulan kotuk fó tan mákina perfurasaun bee, agora fó tan ambulánsia tolu mai Timor.
“Momentu ne’e iha mes de outobru tinan kotuk señor Ministru rasik mak ba asina ho Vise-Governadór Hunan, agora ambulánsia ne’e atu mai nia funsaun mak atu kompleta de’it, ita iha duni ambulánsia mais relasaun amizade sira haree ita nesesita duni ambulánsia.” Realsa gia
Ho nune’e atu kompleta ita-nia defisiénsia sira iha seitór saúde ne’e la’os laiha ambulánsia mak Hunan fó, maibé sira atu kompleta de’it ambulánsia para depois bele halo atendimentu ba pasiente sira ne’ebé moras.
Nia afirma katak ambulánsia tolu husi provínsia Hunan ne’e relasaun ho Munisípiu Manatutu, maibé asina kontaratu ho Ministériu tanba presiza duni apoiu ambulánsia balu ba governu sentrál, tanba ambulánsia ida sei entrega ba Ospitál Nasionál Guido Valadares hodi apoiu servisu, nune’e Manatutu hetan ambulansia rua.
Administradór Munisípiu Manatutu ne’e informa katak, Postu-Administrativu neen (6), Munisípiu Manatutu Ambulánsia rua (2), hamutuk ambilánsia walu (8), aumenta ho provínsia Hunan nia apoiu ambulánsia 2 ne’e Munisípiu Manatutu nia totál hamutuk ambulánsia 10.
Reportajen : Estefania
Foto : Estefania