Dili, 21 Abril 2025 (Média Democracia) – Cecilia de Jesus Alves hanesan estudante ho kondisaun difisiensia matan, ne’ebé hala’o estudu iha Universidade Nasional Timor Lorosa’e UNTL, iha Fakuldade Siensia Sosiais FCS no Departamentu Inkluzaun Comunitariu Sosial ICS, Cecilia enkoraja maluk difisiente no maluk la ho difisiente atu labele moe buka osan no aprende hamutuk.
Iha entrevista ho estudante ho kondisaun difisiente “matan” Cecilia de Jesus Alves hanesan estudante ida ne’ebé mai ho kondisaun difisiente “matan” maibé Cecilia la moe atu aprende hamutuk ho nia maluk sira la ho difisiente iha Universidade nomos la moe atu buka osan liuhusi atividade negosiu kikoan sira iha uma.
“Ha’u hanesan estudante Inkluzaun Comunitario Sosial ho kondisaun difisiente, ha’u eskola iha Fakuldade Siensia Sosiais no Departamentu ICS, agora ha’u livre teoria no iha ona espasu ba hakerek traballu sientifiku ka iha ona prosesu hakerek monografia.” Dehan Cecilia de Jesus Alves
Nia hatutan durante hala’o prosesu aprendizajen iha Fakuldade Siensia Sosais iha Departamentu Inkluzaun Comunitaria Sosial, ida ne’e hanesan estudante ne’ebé mai ho kondisaun difisiente matan la hanesan ho kolega sira seluk sente orgullu tebes tanba bele hetan oportunidade ida ne’e hodi hala’o estudu hamutuk ho kolega sira ne’ebé mai ho kondisaun difisiensia ne’ebé la hanesan no iha maluk balun ne’ebé la ho kondisaun difisiente iha universidade no la hetan diskriminasaun husi kolega sira husi Departamentu seluk.
“Durante aprende iha Departamentu ida ne’e iha dezafiu balun ne’ebé ami sempre hasoru hanesan difisil ba ami ne’ebé mai ho kondisaun difisiente matan la iha dosente espesifiku nomos la iha fatin tur ne’ebé seguru ba ami sira ho kondisaun difisiente matan, tilun no fiziku nian, haree fali ba iha prosesu estudu nian la’o ho di’ak tebes tanba dosente balun koopera di’ak ho ami nomos ho kolega sira seluk.” Hatutan Cecilia ba jornalista Média Democracia
Nia informa aleinde hanesan estudante ho kondisaun difisiente maibé la lakon vontade atu aprende nomos hala’o atividade iha liur hanesan ajuda bin sira fa’an sasan atu nune’e bele iha osan hodi selu bemo ba iha eskola.
“Ha’u la moe ho ha’u nia kondisaun ne’ebé difisiente atu buka osan tanba ha’u hanesan estudante joven feto, nafatin esforsu hodi buka osan, tanba bainhira ita la buka osan se mak atu fó osan ba ita no labele depende ba inan aman nomos familia, tanba ne’e ha’u sempre iha atividade seluk hanesan fa’an sasan hodi ajuda osan bemo loron-loron nian durante ne’e.” Informa nia
Nia saliente durante ne’e husi atividade negosiu kikoan ne’ebé hala’o ne’e fasilita tebes tanba bele suporta ona husi osan bemo, osan kopia nomos uza ba iha nesesidade loron-loron nian, tanba inan ho aman iha foho hotu, karik depende de’it ba inan aman no familia sira entaun susar tebes, tanba ne’e hanesan joven maske ho kondisaun difisiente maibé nafatin iha vontade no esforsu nafatin hodi buka osan suporta ba an-rasik
Cecilia hanesan joven feto ne’ebé mai ho kondisaun difisiente “matan” hato’o hela nia mensajen no enkoraja maluk joventude sira ne’ebé ho kondisaun difisiente nomos la ho kondisaun difisiente atu badinas buka osan no aprende hamutuk iha area saida de’it, atu sai joven ida maduru labele depende ba iha familia, tanba futuru iha liman rasik no atu deside futuru ne’e laos ema seluk maibé ita nia an-rasik.
Reportajen : Domingas
Foto : Domingas