Dili, 25 Abril 2025 (Média Democracia) – Primeiru Ministru Kay Rala Xanana Gusmão hato’o nia sentimentu triste hafoin fila husi viajen rai liur, sentimentu triste ne’e espresa husi PM Xanana hafoin hetan entrevista ho jornalista sira iha Aeroportu Internasional Nicolau Lobato, Dili.
Iha entrevista ho Primeiru Ministru Kay Rala Xanana Gusmão hateten, Sua Santidade Papa Francisco hanesan ema ida ne’ebé mundu tomak hatene no koñesidu tebes, apresia tanba nia korajen ne’ebé sempre fó ba sarani hotu liu-liu ba iha joventude sira nomos ba iha lider funu nain sira atu hatudu etika hadomi malu, tanba bainhira imi halo funu ema seluk mak sofre liafuan hirak ne’e la’os Sua Santidade Papa ko’alia de’it ba iha nasaun Ukrain no Palestina maibé koalia ba iha lider hotu no foin lalais ne’e Sua Santidade Papa mós ko’alia kona-ba nasaun Gaza atu hadomi malu labele odio malu, nune’e povu sira labele terus.
“Sua Santidade Papa Francisco hanesan bibi atan ida ne’ebé sempre fó hanoin ba lider atu hadomi malu, hadomi mós ba iha ninia ema sira, papa mós husik hela nia mensajen lubuk ida ne’ebé durante nia vizita, iha mensajen ida mak Papa husu sarani sira atu tulun malu liuliu ba maluk sira ne’ebé kbi’it la’ek. Papa sai hanesan ezemplu ida iha igreja katolika nia laran no sai mós imajen ida ba lider sira haree ba iha moral umanidade nomos haree ba aspetu ba moris nian no Papa hanesan umanu ida ne’ebé hadomi sarani katolika no sempre hakua ema hotu la haree ba kor ka relijiaun.” Liafuan hirak ne’e hato’o husi Primeiru Ministru Kay Rala Xanana Gusmão hafoin hetan entervista husi jornalista sira iha Aeroportu.
Nia hatutan, foin lalais vizita Sua Santidade Papa Francisco iha Timor-Leste atrai tebes sarani katolika Timor-Leste liuliu joven sira, ho liafuan hirak ne’e sarani sira konsentra iha altar tasi-tolu mundu admira ho prezensa husi sarani sira iha vizita ne’e, Sua Santidade husik hela liamenon barak ne’ebé halo sarani sira sente triste no lakon tebes bibi atan diak ida, laos sarani katolika Timor deit maibé mundu sente lakon ho novidade ne’ebé foin lalais iha dia 21 abril ne’ebe hafanu sarani hotu ho triste katak Sua Santidade Papa Francisco hakotu ona nia peregrinasaun iha mundu ne’e.
Reportajen : Domingas
Foto : Domingas
Editor : Jp.Costa