Dili, 21 Maiu 2025 (Média Democracia) – Prezidente Repúblika, fó Kongratula ba Governasaun Kayrala Xanana Gusmão ne’ebé susesu oraniza forum kona-ba direitu tasi ho susesu, ba disputa fronteira maritima nian, hato’o diskursu iha komemorasaun aniversariu loron restaurasaun independénsia 20 Maiu ba da-23, realiza iha Palásiu Prezidensiál Aitarak-laran, Dili tersa semana ne’e
Prezidente da Republika, José Ramos Horta iha diskursu hateten, governu realiza mós iha Timor-Leste Dili Diálog Fórum Internasionál 2025 kona-ba Liberdade Imprensa no Intelijensia Artifisiál neʼebé organiza husi Konsellu Imprensa (CI, sigla portugés) Timor-Leste.
“Ha’u aproveita mós tempu iha momentu solene ida-ne’e atu fó parabéns ba ita-nia governu liu-liu Primeiru-Ministru Kay Rala Xanana Gusmão ba realizasaun ho susesu Fórum kona-ba Direitu Tasi nian no Rezolusaun ba Disputa sira kona-ba Fronteira Marítima, ne’ebé halibur figura importante na’in-100 ne’ebé matenek iha Direitu Internasionál no Direitu Tasi nian.” Dehan Prezidente da Republika, José Ramos Horta
Prezidente Republika hatutan hodi hatán ho korajen no vizaun ba dezafiu sira neʼebé hamosu husi Intelijensia Artifisiál, média sosiál no demokrasia dijitál, Timor-Leste reafirma ona ninia kompromisu ba sosiedade ida ne’ebé livre ba buat hotu-hotu nakloke no iha prova ba futuru.
“Fórum ida ne’e destaka hanesan espasu vital ida ba reflesaun no partilla, iha ne’ebé lian nasionál no internasionál sira halibur hamutuk iha objetivu komún ida atu garante katak teknolojia serví umanidade, katak liberdade espresaun hetan protesaun no demokrasia kontinua kuda ho responsabilidade no transparénsia. Ita mós sei sente atu sai uma-na’in ba Semináriu Rejionál kona-ba Deskolonizasaun neʼebé organiza husi Governu Timor-Leste no Komité Espesiál Nasaun Unida nian kona-ba Deskolonizasaun (C24).” Dehan Prezidente da Republika
Nia informa enkontru ne’e importante hala’o ba dala uluk iha Díli, hetan partisipasaun husi diplomata 100 liu, ne’ebé akreditadu iha Sede Nasaun Unida nian iha Nova lorke nune’e mós reprezentante diplomátiku sira husi nasaun sira iha rejiaun Pasífiku, ne’ebé fó onra ba sira nia prezensa.
“Diplomata 100 liu sira nia vinda mai Timor-Leste nu’udár razaun ksolok no onra nian, hodi hatudu ita-nia kompromisiu konstitusionál ba prinsípiu sira autodeterminasaun no deskolonizasaun nian neʼebé seidauk hotu iha territóriu barak. Eventu hirak ne’ebé mensiona ona akontese iha momentu ida neʼebé partikularmente simbóliku, bainhira ita selebra aniversáriu ba da-23 Restaurasaun ita-nia Independénsia nian.” Prezidente Republika haktuir
Nia afirma prezensa husi distintu konvidadu sira ne’e reforsa rekoñesimentu husi Timor-Leste nia trajetória no nia lian ativu iha Nasaun Unida nia laran, liu-liu kona-ba promosaun husi direitu husi povu sira neʼebé sei iha administrasaun koloniál nia okos.
Esplika liután Timor-Leste, nasaun ida-ne’ebé moris rasik prosesu deskolonizasaun, simu enkontru rejionál Pasífiku ne’e ho espíritu solidariedade, responsabilidade no esperansa. Aleinde enkontru ne’e bele kontribui ba hametin momentu internasionál ba mundu ida livre husi kolonializmu, iha povu hotu-hotu bele ezerse sira-nia direitu tomak ba liberdade, dignidade no hili futuru rasik.
Reportajen : Nelfiano
Foto : Média Officer PR