Dili, 22 Maiu 2025 (Média Democracia) – Queensland Australia, Komunidade traballador Timor-oan sira ne’ebé servisu iha kompaña agrikultura Queensland Berries iha Austrália hasoru malu atu komemora Loron Restaurasaun ba Independénsia Timor-Leste ba dala 23, iha loron 20 Maiu 2025. Selebrasaun ne’e hala’o iha Tersa semana ne’e.
Reinhard Banni hateten, atividade prinsipal iha loron importante ne’e mak misa agradesimentu, ne’ebé organiza iha área servisu kompaña nian, ho objetivu atu hatudu obrigadu ba Maromak tan rai Timor-Leste ne’ebé hetan indepedénsia fali husi okupasaun iha tinan 2002.
“Misa ne’e orienta ho lian Tetun ho ingles, hodi fasilita kompriensa ba partisipante hotu, inklui líder komunitáriu no foun sira ne’ebé la’o programa Pacific Australia Labour Mobility (PALM). Iha dadus husi organizadór sira, liuhusi 300 Timoroan partisipasaun, bele hatudu união no solidariedade entre sira.” Dehan Reprezentante traballadora Reinhard Banni
Nia mós salienta tan katak nu’udar joven foin sae, mai ita uja ita-nia liberdade, uja ita-nia independensia ida ne’e hodi sai sidadaun ne’ebe di’ak no sarani kristaun ne’ebé di’ak ba iha ita-nia sosiedade.
“Maske ami hanesan traballador ne’ebé servisu iha ema nia rain maibé ami sei la haluha istoria no sakrifisiu ema boot atu halo Timor-Leste sai nu’udar nasaun ida ne’ebé demokasia ba ema hotu moris livre. Selebrasaun misa ida ne’e mak forma ida atu fó obrigadu.” Dehan nia
Nia salienta mai hamutuk fó liman ba malu, hodi hakribi violensia no problema hotu, nune’e bele kria paz no estabilidade domin no damen iha familia no sosiedade leet, espera ba futuru Timor-Leste sai nasaun ida ne’ebé furak liu no prósperiu iha mundu.
Iha fatin hanesan, Amu Martinho da Costa hateten, iha selebrasaun misa ba aniversariu loron nasional 20 de Maiu, restaurasaun independensia ba dala-23 ida ne’e hodi husu grasa no tulun ba Aman Maromak atu haraik bensaun povu no heroi tomak ne’ebé luta ba ukun rasik-aan.
“Hanesan iha homelia Jesus dehan ‘’ha’u hadomi ona imi, saida mak imi sei fó ba ha’u liuhusi imi nia moris loron-loron, Jesus dehan dala ida tan “ha’u hadomi ona imi”. Oinsá mak imi bele habelar no haburas domin ne’ebé ha’u husik hela ba imi, ita-nia dever no ita-nia obrigasaun nu’udar sidadaun mak tenke obedese ba moris hotu.” Dehan iha homelia
Nia hatutan kompaña Queensland Berries kontente ho kontribuisaun traballador Timor-oan sira iha industri fruta no apoiu sira ba atividadi sosiál ho kultura. “Sira mak parte importante ba iha ekipa refere.
Esplika liután kompaña Queensland Berries nafatin respeita kultura Timor-Leste nian tenke tuir liberdade atu selebra loron restaurasaun independensia Timoroan hotu tenke respeitu no hakru’uk momentu importante hanesan ne’e. Atu remata loron komemorativu, komunidade hato’o domin ba Maromak atu kontinua fó protesaun ba Timor-Leste no ba emigrante sira hotu iha rai laran no rai liur.
Reportajen : Nelfiano
Foto : Traballador kompaña Queensland Berries Dilan