Dili, 17 Juñu 2025 (Média Democracia) – Sekretariu Estadu Kooperativa SECoop hala’o enkontru ho Membru Movimentu Kamponeza Timor-Leste (MOKATIL) kada Munisipiu aprezenta sira nia relatoriu durante tinan rua hala’o servisu ka halo produsaun ba produtu Bafo Kayrala, haree nomos produtu seluk hanesan koto iha Munisipiu sira. Enkontru ne’e hala’o iha sala SECoop, Akait Dili, segunda semana ne’e.
Sekretariu Estadu Kooperativa SECoop Arsenio Pereira hateten, objetivu husi enkontru ida ohin ne’e atu bolu hamutuk mai hodi hato’o relatoriu durante tinan rua ona ba iha servisu, haree liubá produsaun sira ne’ebé durante ne’e imi hala’o iha Munisipiu idaidak.
“Enkontru ohin ha’u rasik hakarak rona husi ita-boot sira kada membru reprezentante husi Munisipiu hirak ne’e tenke fó sai relatorio durante tinan rua, haree liubá produsaun Bafo Kayrala nomos produsaun seluk ne’ebé ita-boot sira produs iha Munisipiu ho kuantidade hira no produsaun ne’e iha Munisipiu ida ne’ebé lori ona nia produtu ba asesu iha merkadu, Munisipiu ida ne’ebé fó apoiu mós ba merenda eskolar hira, no produtu hirak ne’e tau ona iha fatin ne’ebé, ema nain hira mak konsumu ona produtu ne’ebé ita-boot sira halo produsaun. Tanba saida mak ha’u tenke husu bai ta-boot sira, tanba to’o loron ohin ha’u seidauk simu relatoriu ka dadus husi ita-boot sira kona-ba produsaun hirak ne’e, nune’e ohin ha’u konvoka enkontru ho ita-boot sira nomos partisipa husi media sira atu publiku servisu ne’ebé ita-boot sira hala’o nune’e ema hotu bele hatene ita-boot nian servisu iha baze.” Dehan Sekretariu Estadu Kooperativa SECoop Arsenio pereira
Nia hatutan, husu kada Munisipiu tenke aprezenta ninia relatoriu kona-ba produsaun ne’ebé durante ne’e hala’o iha Munisipiu idaidak, nomós haree ba iha Diresaun Nasional Munisipiu sira nia komunikasau ho Movimentu Kooperativa Sektoral hodi hala’o produsaun ba produtu oioin hanesan Bafo Kayral, haré, koto, nune’e SECoop bele hatene ninian relatorio husi membru mokatil sira.
“Ha’u konvoka enkontru ohin no ha’u mos bolu media nasional sira mai hotu atu ita-boot sira aprezenta rasik relatoriu servisu iha Kada Munisipiu ne’e to’o iha ne’ebé ona, tanba dalaruma media sira konfirma mai hela deit ha’u no ha’u sempre hatan ba sira katak ha’u seidauk simu dadus husi membru Mokatil sira husi Munisipiu, no ohin loron ita-boot sira tenke aprezenta kada Munisipiu, atu nune’e publiku bele hatene imi nia servisu no apoiu husi governu liuhusi SECoop haree ba iha produsaun ba produtu sira ne’e imi halo ona saida no imi atinji ona iha ne’ebé, nune’e publiku sira bele mós hatene lolos.” Hatutan Sekretariu Estadu Kooperativa SECoop
Apoiu lubuk ida ne’ebé husi SECoop entermu haree liubá iha transferensia publiku ba kada Munisipiu atu halo produsaun, durante ne’e SECoop simu de’it informasaun liuhusi media sosial Whatshap maibé ohin husi reuniaun ida ne’e SECoop hakarak rona rasik husi reprezentante membru Mokatil kada munisipiu.
“Relatoriu sira imi aprezenta liuhusi media nasional atu nune’e publiku hodi hatene no bainhira sira hakarak sosa produtu hirak ne’e karik sira bele sosa no sira hatene ona Munisipiu ida ne’ebé produs haré ka Bafo kayrala barak liu, atu nune’e hafasil publiku sira hatene katak kada Munisipiu sira mai ho produsaun ho tonelada ne’ebé la hanesan.” Hatutan Arsenio Pereira
Nia reafirma relatoriu ne’e importante tanba ema hotu bele hatene produsaun ne’ebé produs husi grupu sira kada Munisipiu ho kuantidade ne’e aas ka menus, nune’e konsumidores sira mós bele mai sosa, se la fó sai relatoriu ba iha publiku relasiona ho produtu hirak ne’e entaun ema la hatene produtu saida mak hala’o iha Munisipiu sira no tempu atu koeleta ne’e kada Munisipiu hetan tonelada hira.
Atu esplika kle’an liután katak iha enkontru refere partisipa masimu husi Munisipiu Likisa, Covalima, Manatutu, Baucau, Lautem, Dili, Manufahi, Ainaro no la marka prezensa iha enkontru ne’e husi RAEOA, Atauro, Ermera no Aileu. Iha enkontru ne’e relatoriu ne’ebé aprezenta husi prezidente Mokatil husi Munisipiu hotu ho produsaun ne’ebé tetu ona hamutuk atus ida tolunulu resin-haat tonelada no iha Munisipiu baucau nian maka foin halo koeleta hela maibé ba iha Munisipiu seluk ne’e primeiru periodu tetu hotu ona ba produtu hare, koto no Bafo kayrala.
Reportajen : Domingas
Foto : Domingas