Dili, 25 Juñu 2025 (Média Democracia) – Timor-Leste sei sai uma nain ba iha konferensia internasional ba dala haat komunidade Luso Asiatiku nian ne’ebé sei hala’o iha CCD Dili durante loron haat hahu husi loron 26 to’o 30 fulan juñu tinan 2025.
Porta-voz APCC Virgilio Smith hateten, semana ida ne’e nia laran komesa husi loron 26-30 sei realiza konferensia boot ida iha Dili ne’ebé hanaran 4ª konferensia ba komunidade Luso Asiatiku katak komunidade sira ne’ebé desendente husi portuges sira ne’ebé tempu uluk liubá mai namkari iha Asia ninia laran husi India mai to’o Timor-Leste.
“Sira ne’e maka sei mai iha Timor hodi realiza konferensia ba dala haat iha Dili no iha konferensia ne’e sei asina deklarasaun ida bolu naran Deklarasaun Dili, katak antes konferensia dala haat ne’e atu realiza, iha ona konferensia tolu ne’ebé hala’o ona iha Malaka ne’e primeiru konferensia, iha segundu no terseiru konferensia ne’e marka prezensa husi Primeiru Ministru Atual Kayrala Xanana Gusmão, maibé iha momentu ne’ebá sei asume kargu hanesan Ministru Plaenamentu no Investimentu Estratejiku, nune’e sira fó hatene katak konferensia ba dala haat sei halo iha Timor-Leste, tanba ne’e mak konferensia ne’ebé sei akontese iha loron 26-30.” Dehan Porta-voz APCC Virgilio Smith
Deklarasaun ne’ebé sei asina iha konferensia ne’e, sei harii mós asosiasaun ida ne’ebé sei halibur sira hotu iha asosiasaun ne’e nia laran no bele integra iha komunidade dos Paises da Lingua Portuguesa ka CPLP, ida ne’e maka objetivu husi konferensia refere.
“Ita espera katak husi konferensia ne’e ita maka sei sai uma nain, husi objetivu ne’ebé ohin ha’u temi ona katak iha konferensia ne’e rasik ita sei harii asosiasaun ida hodi halibur komunidade sira ne’ebé mai partisipa iha konferensia ne’e, tanba ita hatene katak komunidade sira ne’e vulneravel iha sira nia nasaun rasik, signifika sira nia moris la iha kbit no balun la hela iha sira nia nasaun rasik, nune’e mak asosiasaun ne’e atu halibur sira hanesan ho Timor, ita estabele lasu istoriku hodi bolu dehan unidade na diversidade ne’ebé antes ne’e sira halibur malu ona.” Informa Porta-voz APCC Virgilio Smith
Konferensia ne’e mós sei garantia futuru ne’ebé di’ak ba komunidade sira nomos ba nasaun Timor-Leste rasik, konferensia ne’e partisipa husi nasaun Sia, India, Mianmark, Srilangka, Thailandia, Malaka, Flores, Malasia, Indonesia, China Makau, inklui mós Timor-Leste.
“Husi konferensia ne’e mak ita atu bolu dehan legadu istoriku katak, ita-nia relasaun ho sira ne’e tanba ita-nia paises ne’ebé hetan sivilizasaun, hetan ukun husi nasaun rua iha tempu ne’ebá, entaun husi konfernsia ne’e atu lori lasus kulturais mai ita ne’ebé atu hametin ita-nia lasu kulturais komum iha komunidade sira hotu. husi konfernsia ne’e mós atu marka diferensa hodi kria amizade ho sira maske sira iha nasaun rasik maibé sira sei vulneravel entaun husi konferensia ne’e ita fiar katak sei marka diferensia, tanba hanesan ohin ha’u temi ona ita sei hametin lasu komum kultural haree ba iha relijiaun katolika nian.” Subliña Porta-voz APCC Virgilio Smith
Nia reafirma, husi konferensia ne’e Timor-Leste la husu atu hetan benefisiu maibé husu oinsa atu sira bele hetan ka garantia futuru ne’ebé dignu ba sira iha sira nia nasaun rasik, tanba ne’e maka harii mós asosiasaun hodi halibur sira hola parte mós iha CPLP nia laran no espera katak ho CPLP nia prezensa iha konferensia ne’e liuliu Sekretariadu Ezekutivu CPLP hodi bele garantia futuru dignu ba sira iha sira nia nasaun rasik.
Reportajen : Domingas
Foto : Domingas