Dili, 25 Jullu 2025 (Média Democracia) – Vise Primeiru Ministru Timor-Leste hamutuk ho Ministeriu Saude, OMS Timor-Leste realiza espozisaun durante loron rua kona-ba loron nasional saude ba dala-10 ho tema “lori servisu saude no sensibilizasaun ba komunidade,” atividade ne’e hala’o iha Ponte BJ Habibie.
Vise Primeiru-Ministru Mariano Assanami Sabino hateten, saúde la’os sees husi dezenvolvimentu nasionál ne’e parte ida. Nune’e husu atu iha esforsu ne’ebé maka’as no unidu liután atu harii sistema saúde ida ne’ebé trata ema hotu ho justu.
“Ita tenke halibur hamutuk no organiza ita-nia an atu hakotu luta ne’ebé la’o hela ba kuidadu saúde ne’ebé di’ak liu.” Dehan Vise Primeiru-Ministru Mariano Assanami Sabino
Nia hatutan Timor-Leste tenke iha ospitál no fasilidade saúde ne’ebé di’ak hanesan iha Malázia, Singapura, ka Indonézia. Nune’e la aseita ba embaixadór ida ka sidadaun ruma atu haruka ba rai-liur atu hetan tratamentu médiku tanba de’it Timor-Leste laiha fasilidade ne’ebé adekuadu. Husu atu hadi’a urjente iha lideransa, finansiamentu, edifísiu sira no formasaun ba traballadór saúde.
“Ha’u husu ba ita hotu atu kuidadu sistema saúde ne’ebé ita iha ona. Ita tenke hadi’a la’os de’it ba ita-nia povu, maibé mós ba vizitante sira hodi nune’e mundu haree Timor-Leste hanesan nasaun ida ne’ebé saudavel no seguru.” Dehan Vise Primeiru-Ministru
Vise Primeiru-Ministru hatutan sistema fibra ótika foun iha Timor-Leste tenke uza hodi halais progresu dijitál iha saúde ida-ne’e importante liu-liu ba moras sira hanesan kankru no problema fuan nian, ne’ebé sei susar atu trata iha rai-laran.
Iha fatin hanesan Reprezentante OMS iha Timor-Leste Arvind Mathur hateten, selebra Loron Nasionál Saúde ba dala-10 hanesan selebrasaun ida nomos tempu ida atu hanoin ho sériu.
“OMS orgullu tebes bele servisu besik ho Ministériu Saúde, liuhusi Programa Integrado de Saúde (PIS) iha Timor-Leste. PIS la’os de’it programa ida maibé ida-ne’e hanesan vizaun ida atu lori kuidadu saúde besik liuba komunidade.” Dehan Reprezentante OMS iha Timor-Leste Arvind Mathur
Nia hatutan PIS inklui prevensaun, diagnóstiku, tratamentu no akompañamentu hotu-hotu halo iha maneira ida de’it. Nia mós hatudu susesu nasaun nian iha kombate moras sira, hanesan hakotu filariase linfátika no kuaze hakotu malária.
Iha sorin seluk Vise Ministru Saúde, Flavio Brandão hateten, apelu ba kompromisu no kuidadu ne’ebé maka’as iha prestasaun servisu saúde nian. Nune’e ba pesoal saude sira tenke trata sira-nia servisu hanesan servisu ba povu, la’os hanesan servisu de’it nune’e hotu bele hetan dignu ba tratamentu iha ospital.
“Ita nu’udar pesoál saúde ka diretór, ita tenke serví ho haraik-an no nunka halo-an hanesan ita iha pasiente sira nia leten.” Vise Ministru Saúde, Flavio Brandão
Vise Ministru informa PIS hanesan dalan ba oin hodi hakbesik servisu saude ba familia sira. Nune’e enkoraja ema hotu iha eventu ne’e atu vizita tenda sira no aprende kle’an kona-ba saida mak Ministériu Saúde ho nia parseiru sira halo daudaun ona.
Esplika liután atividade ne’e hahú ho Marcha Saudável husi Edifisiu Ministériu Saúde ba Ponte BJ Habibie. la’o sai hanesan espetákulu animadu ida. Vise Ministru Fortalesimentu Institusionál Saúde no Reprezentante OMS iha Timor-Leste, hamutuk ho Diretór Jerál sira, pesoál Ministériu Saúde no traballadór saúde sira iha liña oin.
Reportajen : Nelfiano
Foto : Media OMS