Díli, 05 Agostu 2026 (Media Democracia) – Kompañia Telekomunikasaun Telemor hamutuk ho Revolta Boxing, kuarta-feira (05/08), oficialmente lansa programa Municipal World, inisiativa ida ne’ebé hakarak identifika, dezenvolve no promove talentu atleta boxing husi munisípiu hotu-hotu iha Timor-Leste. Programa ne’e fó oportunidade ba joven no atleta amador sira ne’ebé iha potensiál atu hatudu sira nia kapasidade liuhosi kompetisaun, hodi reprezenta sira nia munisípiu no loke dalan ba kompetisaun internasionál, inklui enkontru ho atleta sira husi Indonézia.
Tuir Xander Serano hatete katak atleta barak iha munisípiu sira iha kualidade no kapasidade boot, maibé seidauk hetan oportunidade atu hatudu sira nia abilidade. Tanba ne’e, programa Municipal World sei sai plataforma ida atu atleta sira bele kompete no reprezenta sira nia munisípiu, hodi promove espiritu kompetisaun saudavel no hametin unidade nasional.
“Objetivu husi parseiria entre Telemor no Revolta Boxing mak atu fó oportunidade ba Timor-oan hotu-hotu atu hatudu sira nia talentu. Antes ne’e ami fó atensaun liu ba atleta profesionál sira, maibé agora ami muda fokus ba atleta amador sira atu buka talentu nasional iha kada munisípiu. Ha’u fiar katak atleta di’ak barak iha munisípiu sira, no liuhusi eventu ida ne’e ami hakarak identifika no dezenvolve sira. Programa ne’e sei hahú iha fulan Setembru no hala’o durante fulan rua ho kompetisaun kada semana rua. Depois ne’e sei kontinua to’o remata programa Municipal World, ne’ebé fó oportunidade ba atleta sira atu reprezenta sira nia munisípiu no luta ho orgulho ba Timor-Leste,” dehan Xander Serano ba jornalista sira iha Timor Plaza, kuarta-feira (05/08/2026).
Nia subliña katak programa ne’e la’ós deit atu hala’o kompetisaun nasional, maibé mós atu loke dalan ba atleta sira husi munisípiu atu aumenta esperiénsia, dezenvolve sira nia kapasidade no prepara an ba kompetisaun iha nivel internasionál.
“Kompetisaun ne’e sei hala’o iha munisípiu balun iha parte Lorosa’e no Loromonu, antes kontinua iha Díli to’o remata. To’o agora, munisípiu 10 mak rejista ona ho total atleta hamutuk ema 100, ho kada munisípiu reprezenta atleta na’in 10. Ami hakarak atu munisípiu 13 hotu partisipa, maibé ba agora foin munisípiu 10 mak prontu. Munisípiu ne’ebé sai kampiaun sei hetan oportunidade atu reprezenta Timor-Leste iha kompetisaun internasionál hasoru atleta husi Indonézia. Ida ne’e mak dalan atu loke oportunidade ba atleta talentozu sira husi munisípiu,” nia dehan.
Aleinde ne’e, CEO Telemor, Sr. Etan, hatete katak Telemor reafirma nia komitmentu atu kontinua fó apoiu no servisu hamutuk ho Revolta Boxing hodi dezenvolve desportu boxing iha Timor-Leste. Nia dehan katak kompanhia la fó atensaun de’it ba negósiu no nia produtu, maibé mós iha vontade atu kontribui ba dezenvolvimentu komunidade, liuliu juventude sira ne’ebé iha talentu iha área boxing. Liuhusi programa no koperasaun ida ne’e, Telemor hakarak fasilita no loke oportunidade ba atleta sira iha Díli no mós iha munisípiu sira atu bele hatudu no dezenvolve sira nia kapasidade.
“Programa no koperasaun ida-ne’e entre Revolta Boxing no Telemor atu promove ita nia talentu jovem sira ne’ebé seidauk hetan oportunidade atu hatudu sira nia talentu iha boxing. Ida-ne’e hanesan oportunidade di’ak, no ami prontu atu kontinua fó apoiu no kopera ho Revolta Boxing. Hanesan kompanhia, Telemor la fokus de’it ba ami nia negósiu no produtu, maibé mós ho laran luak hakarak suporta ita nia komunidade, liuliu juventude sira ne’ebé iha talentu iha boxing. Liuhusi programa ida-ne’e, ami hakarak fasilita oportunidade ba komunidade sira iha Díli no mós iha munisípiu sira atu bele dezenvolve no hatudu sira nia kapasidade,” Nia hakotu.
Reportangen: Joanita Imaculada
Foto: Joanita Imaculada