Dili, 16 Setembru 2025 (Média Democracia) – Sekretária Estadu ba Igualdade S.E.I hamutuk ho Banku Dezenvolvimentu Aziátiku ADB halo lansamentu relatóriu final hodi halo avalisaun programa fundu transferénsia públika hakbiit feto no grupu vulneravel sira iha Timor-Leste.
Sekretaria Estadu ba Igualdade, Elvina Sousa Carvalho hamutuk ho Diretora Banku Dezenvolvimentu Aziátiku Misaun Rezidente Timor-Leste Stefania Dina, Ohin loron 12 Fulan-setembru tinan 2025, iha salaun suai, Timor Plaza, halo lansamentu ba rejultadu final relatoriu avaliasaun programa Fundu Transferénsia Públika Hakbiit Feto no Grupu Vulnerável sira iha Timor-Leste.
“Programa Hakbiit Ekonomia Feto marka pasu krusiál ida ba Timor-Leste nia kompromisu atu promove igualdade jéneru no empoderamentu feto nomos grupu vulnerável sira ekonómikamente inisia husi Sekretaria Estadu ba Igualdade (SEI), programa refere oferese ona suporta signifikante tantu finansiál no tékniku ba feto sira, Ema ho Defisiénsia, nomos individu LGBTQI+ sira liuhusi mekanizmu Fundu Transferénsia Públiku (FTP).” Dehan Sekretária Estadu Igualidade, Elvina Sousa Carvalho
Sekretaria Estadu hatutan, subvensaun hirak ne’e loke ona dalan oioin ba benefisiáriu sira atu estabelese no haforsa negósiu mikro no ki’ik sira, loke mós oportunidade ba auto-dependénsia, reziliénsia no fó impaktu ba komunidade.
“Husi avaliasaun ikus, ne’ebé hala’o ho kolaborasaun hamutuk ho Banku Dezenvolvimentu Aziátiku (Sigla Inglés ADB), oferese informasaun krítiku sira kona-ba susesu nomos dezafius husi programa refere to’o ohin loron. Fó naroman ba área hirak ne’ebé presiza hadi’ak liután liuliu atu suporta investimentu iha setór sira-ne’ebé viável liu, hadi’ak esforsu kapasitasaun sira, nomos haforsa programa governu nian. Lisaun hirak-ne’e bele sai instrumentu ida hodi forma diresaun.” Hatutan Sekretária Estadu Igualdade S.E.I
Sekretaria Estadu Igualdade S.E.I reafirma nia kompromisu atu kontinua hadi’ak programa Hakbiit Ekonomia Feto liuhusi koordenasaun ida forte liután, suporta ho alvu, no polítika responsivu sira. Hodi harii husi fundasaun ne’e atu haluan oportunidade ekonómika no garante katak laiha ema ida husik hela iha kotuk iha ita-nia jornada ba Timor-Leste ida-ne’ebé inkluzivu no ekitativu liután.
Iha iha fatin hanesan Diretora Banku Dezenvolvimentu Aziátiku Misaun Rezidente Timor-Leste, Stefania Dina hateten, lori ADB nia naran fó apresia tebes ba S.E.I ninia lideransa no kompromisu boot ba feto nia empoderamentu ekonómiku.
“Banku Dezenvolvimentu Aziátiku ADB nafatin iha kompromisu servisu hamutuk ho S.E.I nomos parte interesada sira hotu atu nafatin haforsa oportunidade ekonomia inkluzivu iha Timor-Leste, atu garante katak laiha ema ida husik hela iha kotuk.” Dehan Diretora Banku Dezenvolvimentu Aziátiku, Stefania Dina
Diretora hatutan, Banku Dezenvolvimentu Aziátiku nafatin servisu hamutuk Sekretária Estadu ba Igualdade S.E.I nune’e ba futuru bele hakbiit feto no grupu vulneravel sira hotu iha Timor-Leste.
Esplika liután iha sermonia lansamentu ne’e marka Prezensa husi Asosiasaun Feto Munisípiu, Parseiru dezenvolvimentu sira nomos Konvidadus sira seluk tan. Agradese ba ADB nia Suporta durante ne’e hodi bele hatudu rejultadu ida posetivu tebes iha Timor-Leste.
Reportajen : Nelfiano
Foto : Média S.E.I