Dili, 29 Setembru 2025 (Média Democracia) – Ministeriu Edukasaun hamutuk ho Comissão Função Pública (CFP) hala’o abertura ofisiál faze Da-III ba formasaun preparatóriu ba manorin hamutuk na’in 178, hanesan manorin na’in ba Ensinu Báziku husi Bolsa Kandidatu ba territóriu Timor-Leste tomak. Serimónia abertura ne’e hala’o iha Salaun Ian Martin INFORDEPE, Segunda semana kotuk, 22/09/2025.
Ministra Edukasaun (ME), Dulce de Jesus Soares hateten, iha diskursu haksolok ohin loron hasoru malu iha Infordepe, hodi hala’o abertura ofisiál ba faze Da-III husi Kursu Formasaun Edukasaun nian, ne’ebé ohin simu profesór foun sira husi Edukasaun Bazika husi Munisípiu hotu iha Timor-Leste tomak. Kursu ida-ne’e reflete kompromisu ida husi Ministeriu Edukasaun ba futuru Timor-Leste nian, tanba prepara profesór sira ba servisu foun ida, liu-liu implementasaun polítika estratéjika Ministeriu Edukasaun nian iha Programa Governu Da-9 nian, tau profesór iha sentru prioridade sira husi Governasaun.
“Formasaun ba Edukasaun ne’e dezeña atu prepara ita-boot sira sai profisionál, importante no fundamentál liu hotu, atu eduka ita-nia oan sira iha tinan primeiru no desizivu liuhusi aprendizajen siklu primeiru no segundu edukasaun báziku. Ita-boot sira inovasaun, dedikasaun no komitmentu ami fiar ita laos de’it atu fó ba sira abilidade esensiál atu lee, hakerek no númeru, maibé mós abilidade sosiu-emosionál presiza atu hasa’e abilidade atu hanoin krítiku no sai ema ne’ebé nakonu ho respeitu metin no kriativu.” Dehan Ministra Edukasaun, Dulce de Jesus Soares
Ministra hatutan Governu Konstitusionál da-9 estabelese nu’udar prioridade ida atu investe iha edukasaun ho kualidade no asegura katak Timor-oan sira iha asesu ba oportunidade aprendizajen ne’ebé sira prepara hela ba dezafiu sira iha sékulu 21. Aleinde hametin formasaun profisionál no kontinua sai hanesan profesór no pilár ida husi vizaun ida-ne’e. Profesór ne’ebé prepardu bele konsolida sistema edukasaun ida-ne’ebé inkluzivu no ekuitativu hodi promove dezenvolvimentu umanu no sosiál iha Timor-Leste.
Iha fatin hanesan, Prezidente Komisaun Funsaun Públika, Agostinho Letêncio de Deus hateten, iha formasaun ne’e importante tebes, tanba la’os haree de’it ba iha pedagojia matéria ka disiplina, maibé sei iha mós formasaun karatér hamutuk ho PNTL, tanba profesór laos de’it formadór, maibé sai edukadór mós.
“Ha’u fiar husi formasaun inisiál ida ne’e sai hanesan baze importante ida ba sira-nia progresaun promosaun aban-bainrua.” Dehan Prezidente Comissão Função Pública, (CFP) Agostinho Letêncio de Deus
Prezidenten hatutan, kursu ne’ebé ohin hahú atu mantein ninia estrutura pedagojika ne’ebé metin, organiza iha kurríkulu lejislativu lima, pedagojia, Teknolojia Informasaun no Komunikasaun ba manorin sira, hodi asegura balansu entre tékniku no dimensaun étika iha misaun nobre.
Esplika liután kursu ida-ne’e hanesan investimentu tékniku, edukativu no umanu kompletu, tanba nu’udar profesór laos de’it atu kontrola konteúdu sientífika no pedagójiku, maibé mós atu fó inspirasaun ba hahalok, haburas valór no prepara sidadaun sira atu moris iha sosiedade ho respeitu, solidariedade no sentidu responsabilidade.
Reportajen : Nelfiano
Foto : Media ME