Dili, 29 Setembru 2025 (Média Democracia) – Sekretária Estadu ba Igualdade S.E.I liuhusi Diretor Geral hala’o abertura ba formasaun kona-ba Igualdade jéneru nomos Violénsia Bazeia ba Jeneru no asediu seksual ba Estudante iha Universidade da Paz UNPAZ. Formasaun ne’e Média Democracia asesu husi pajina S.E.I Segunda semana ne’e.
Diretor Geral S.E.I Armando da Costa hateten, formasaun ne’e atu haforsa koñesimentu no prevensaun Violénsia Bazeia ba Jéneru, Asédiu Seksuál no asuntu Igualdade Jéneru iha nivel Universitáriu sira.
“Formasaun ida-ne’e sei haforsa koñesimentu Estudante Universidade sira atu hatene asuntu Igualdade Jéneru, Violénsia Bazeia ba Jéneru no Asédiu Seksuál, fornese estudante Universitáriu sira ho koñesimentu, atitude no abilidade atu prevene no responde situasaun diskriminasaun no violénsia, kompriende konseitu báziku, forma sira kona-ba jéneru, igualdade jéneru, asédiu seksuál no violénsia bazeia ba jéneru no estudante sira bele sensivel ba prátika prevensaun iha kampus no motiva estudante sira hodi promove kultura respeitu no igualdade.” Dehan Diretor Geral S.E.I Armando da Costa
Diretór-Jerál S.E.I hatutan, iha abertura ne’e liuhusi Sekretaria Estadu ba Igualdade (SEI) hamutuk ho Ministériu Ensinu Superiór, Siénsia no Kultura (MESSK) lansa ona programa ida ho naran “Kampus Seguru” iha UNTL depois iha Universidade privadu sira asina ona akordu ho MESSK hodi bele aplika Kampus Seguru.
“Kampus Seguru ba ambiente ne’ebé estudante feto no mane, ida-idak ho nia karáter, bele partisipa prosesu edukasaun nian iha eskola sira ho livre inklui universitáriu sira lahó tauk, ameasa husi parte seluk nune’e mós livre husi esplorasaun sira.” Hatutan Diretor Geral S.E.I
Diretor Geral afirma, formasaun ida-ne’e ho espetasaun atu estudante sira hatene kona-ba definisaun igualdade jéneru, VBJ no asédiu seksuál, lei nasionál no instrumentu internasionál relevante, impaktu violénsia ba vitima, familia no komunidade.
“Liuhusi formasaun ne’e mós ita hein katak estudante sensível no respeita diferensa jéneru, estudante hetan mudansa atitude kontra diskriminasaun, estereótipo no prejuisu bazeia ba jéneru no estudante sira prontu hodi rejeita denúnsia prátika asédiu seksuál.” Informa Diretor Geral S.E.I Armando da Costa
Diretor subliña, formasaun ida-ne’e mós sei aumenta koñesimentu estudante sira hodi identifika situasaun potensiál VBJ no asédiu seksuál iha kampus, estudante iha kapasidade atu envolve iha asaun prevensaun hanesan kampaña no aktivizmu pozitiva sira, promove kultura respeitu no seguransa ba estudante hotu, redús kazu diskriminasaun no asédiu seksuál iha ambiente universitáriu no aumenta partisipasaun ativa mane ho feto iguál iha vida akadémiku no lideransa.
Esplika liután Sekretaria Estadu ba Igualdade hamutuk ho parseiru sira halo ona formasaun ho tópiku hanesan ba iha Estudante sira iha UNTL no Universidade privadu no Estudante iha Munisípiu sira ho fasilitadór mai husi S.E.I liuhusi Diresaun Nasionál Polítika Igualdade Jéneru (DNPIG) hamutuk ho Parseiru ALFeLa, FOKUPERS no TAF-NABILAN.
Reportajen : Nelfiano
Foto : Media S.E.I