Dili, 02 Dezembru 2025 (Média Democracia) – Sekretaria Estadu Igualidade-S.E.I hamutuk ho Ministeriu Ensino Superior hala’o workshop kona-ba integrasaun prevensaun no resposta ba Violénsia Bazeia ba Jeneru iha Kurikulum Universitariu. Atividade Workshop ne’e hala’o iha Hotel Timor Segunda semana ne’e.
Sekretaria Estadu Igualidade-SEI, Elvina Sousa Carvalho hateten, atividade workshop ne’e nu’udar konsultasaun ida hodi hetan komitmentu husi Universidade nomos Ensino Superior sira kona-ba oinsa atu integra Violénsia Bazeia ba Jeneru iha kurikulu Edukasaun nian.
“Ha’u hanoin atividade ne’e momentu ida ne’ebé importante tebes halo diskusaun atu hetan komitmentu seriadade husi Universidade nomos Ensino Superior ba iha prevensaun Violénsia Bazeia ba Jeneru, ita hotu hatene daudaun VBJ sai hanesan problema boot ba Universidade nomos Ensino Superior la ses husi VBJ no asediu seksual.” Dehan Sekretaria Estadu Igualidade-SEI, Elvina Sousa Carvalho
Sekretaria Estadu hatutan, nonu-governu konstituisional seriu tebes atu haree kona-ba asuntu refere, tanba ne’e Ministeriu Ensinu Superior, Sekretaria Estadu Igualidade nomos parseiru UNFPA inklui Universitariu hotu-hotu konsentra atu diskute integra prevensaun no resposta ba VBJ iha kurikulu Edukasaun nian.
Iha fatin hanesan Ministru Ensino Superior Siensia no Kultura, José Honório da C.P. Jerónimo hateten, ohin realiza seminar ida koalia kona-ba Violénsia Bazeia ba Jeneru koko haree oinsá bele hatama iha kurulu padraun nasional atu nune’e bele hanorin iha estudante Ensino Superior hotu-hotu iha rai laran.
“Materia husi UNFPA kona-ba Violénsia Bazeia ba Jeneru ne’e iha tanba importante tebes atu hatama iha kurikulu padaraun nasional atu nune’e bele hanorin ba ita-nia instituisaun Ensinu Superior sira hotu iha rai laran. Ita-nia sosiadade ohin loron ladun tau importansia atu respeita ita-nia feto sira no labarik feto liu-liu iha eskola.” Hatutan Ministeriu Ensino Superior Siensia no Kultura, José Honório da C.P. Jerónimo
Ministru Ensino Superior hatutan, husu ba estudante sira hotu bainhira hasoru problema sira hanesan asediu seksual iha eskola tenke brani atu koalia sai ba parte relevante sira nune’e bele rezolve problema ne’ebé enfrenta.
Entertanu atu agradese ba UNFPA iha komitmentu ne’ebé di’ak, Sekretaria Estadu Igualidade-SEI nomos Parlamentu Nasional Komisaun G, atu introduz materia Violénsia Bazeia ba Jeneru iha kurikulum nasional Estadu, nune’e bele fasilita ba estudante sira iha rai laran.
Esplika liután Sekretaria Estadu Igualidade-SEI, Ministeriu Ensino Superior hamutuk ho UNFPA hala’o workshop kona-ba integrasaun prevensaun no resposta ba Violénsia Bazeia ba Jeneru iha Kurikulum Universitariu.
Reporatjen : Nelfiano
Foto : Nelfiano