Dili, 29 Dezembru 2025 (Média Democracia) – Governu liuhusi Ministeriu Koordenador Asuntu Ekonomiku (MKAE) Hamutuk ho Centru Logistika Nasional (CLN) realiza atividade sorumutu kona-ba Avaliasaun Dezempeñu Servisu ba Funsionariu CLN.IP tomak. Atividade ne’e hala’o iha Salaun CNE Kolmera, Segunda semana ne’e.
Koordenador Jeral MKAE Ambiente no Turismu, Jorge Rui de Carvalho Martins hateten, ohin realiza atividade ne’e atu halo avaliasaun ba instituisaun sira hanesan Centru Logistika Nasional, Indimo, IADE, Alfaesa, kada tinan sempre halo avaliasaun servisu ida-idak nian.
“Ohin ha’u koalia ona Governu preve ona fiar no responsabilidade tinan ida nian kada Instituisaun ida-idak avaliasaun dezempeñu, nune’e atu haree kona-ba progresu servisu tomak ne’ebé sira halo durante tinan ida nia laran.” Dehan Koordenador Jeral MKAE Ambiente no Turismu, Jorge Rui de Carvalho Martins
Koordenador Jeral MAKE hatutan, espera katak institusaun ida-idak labele lori egoizmu pesoal atu tau iha servisu fatin, nune’e instituisaun Governu atu serve ema ne’ebé iha koiñesimentu laos atu serve ema ne’ebé laiha koiñesimentu servisu.
“Ita presiza ema ne’ebé iha koiñesimentu atu mai halo servisu laos tanba ha’u nia grupu mak ukun ona dehan instituisaun ne’e ha’u nian, ne’e labele akontese tanba instituisaun ne’e Governu no povu nian. Laos povu hotu tama iha grupu politiku maibé povu mak Governu no Governu mak povu ne’ebé ita tenke esforsu iha sorumutu ne’e, no ha’u hakarak funsionariu hotu tenke responsalidade papel Instituisaun ida-idak nian.” Hatutan Koordenador Jeral MKAE Ambiente no Turismu
Koordenador Jeral afirma, dalabarak instituisaun ida-idak servisu ladun lao di’ak, tanba uza instituisaun ne’e hanesan sira nian rasik, maibé la hatene katak instituisaun ne’e povu hotu nian, nune’e husu ba funsionariu hotu servisu tenke responsalidade.
“Ita tenke dedikasaun ita-nian atu serve povu, atu hadia di’ak liután ita-nia servisu preve prestasaun ne’ebé di’ak tuir kontestu ne’ebé real iha povu. Ita nafatin esforsu tomak bele lao ba oin, ita-nia esperansa iha institusaun hotu bele hala’o kna’ar ho kualidade tuir programa prioridade ne’ebé Governu fó ona atu hala’o servisu.” Koordenador Jeral afirma
Koordenador Jeral relata, instituisaun ida-idak kolia kona-ba komunidade koletiva sira no servisu koletiva, ema dehan servisu hamutuk bainhira pesoal ida sai hanesan administrasaun nia tenke servisu profisional, lidera ekipa servisu ho pasensia hodi objetivu ida de’it atu alkansa instituisaun ba futuru.
Iha fatin hanesan Prezidente Centru Logistika Nasional (CLN), António de Araujo Soares hateten, ohin Centru Logistika Nasional hamutuk ho Govenu liuhusi Koordenador Asuntu Ekonomiku realiza atividade sorumutu koba-ba avaliasaun dezempeñu ba funsionariu tomak iha CLN.
“Ohin realiza sorumutu ne’e atu halo avaliasaun dezempeñu ba ita-nia servisu durante tinan ida nia laran hodi aprezenta relatoriu servisu kada diresaun ida-idak nian, nune’e ita hotu bele akompaña hodi hatene lolos servisu ne’ebé kada diresaun halo durante tinan ida nia laran.” Dehan Prezidente Centru Logistika Nasional (CLN), António de Araujo Soares
Prezidente Centru Logistika Nasional hatutan, servisu durante tinan ida nia laran kada diresaun halo sempre hetan iha vantajen no dezvantajen, maibé iha tinan ida ne’e servisu hotu lao normal laiha failansu ruma entre diresaun ba diresaun.
Esplika liután relasiona ho atividade sorumutu ne’e realiza husi Centru Logistika Nasional (CLN) Partisiapa husi Ministeriu Koordenador Asuntu Ekonomiku (MKAE) hodi halo Avaliasaun Dezempeñu Servisu tomak durante tinan ida nia laran husi Centru Logistika Nasional hala’o.
Reporatjen : Nelfiano
Foto : Nelfiano