Dili, 10 Fevereiru 2026 (Média Democracia) – Asosiasaun HAK realiza Konferensia Imprensa atu informa ba publiku kona-ba rekrutamentu teste ajenten PNTL foun nian ne’ebé mosu indikasaun diskriminativu, aleinde ne’e la hatudu pratika boa Governasaun nian. Konferensia refere hala’o iha Salaun HAK Farol Dili.
Porta-voz HAK, Marina Galucho hateten iha komunikadu, Asosiasaun HAK nu’udar organizasaun Naun-Governamental, ne’ebé servisu iha área direitus umánus, observa katak prosesu rekrutamentu Polisia Nasionál Timor-Leste (PNTL) ne’ebé dadaun la’o hela mak momentu importante atu kontinua fortalese profisionalizmu, integridade no konfiansa públika ba forsa siguransa estadu nian.
“Ami apresia no rekoñese esforsu husi Governu no Instituisaun relevante sira ba politika rekrutamentu ida ne’e, maibé hanesan organizasaun direitus umanus ne’ebé tau matan ba asuntu direitus urmanus hakarak subliña katak, rekrutamentu Polisia Nasional Timor-Leste PNTL presiza la’o tuir prinsipiu legalidade, transparénsia, méritu, imparsiátidade, igualidade no oportunidade, tuir prinsipiu direitus umanus no enkuandramentu legal sira neʼebé vigor.” Dehan Porta-voz HAK, Marina Galucho
Porta-voz hatutan, haree ba nesesidade siguransa iha rai laran mak Konsellu Ministru diside hodi loke vaga ba kandidatu foun PNTL liuhusi Diploma Ministerial numeru 17/2025, 25 Juñu altera ona ho Diplome Ministerial numeru 37/2025, 10 de Outubro kona-ba rekrutamentu ba ajente Polisia Nasional Timor-Leste. Rekrutamentu ne’e importante tebes tanba PNTL mak instituisaun siguransa públika neʼebé iha papel estratéjiku atu proteje no garante siguransa ba sidadaun sira nian iha estadu direitu demokrátiku.
“Iha loron tolu fulan fevereiru 2026 liuhusi Komisaun Rekrutamentu PNTL públika lista jeral kandidatu foun ho total rihun sanulu resin-rua atus-ualu hitunulu resin-haat (12.874). Husi númeru ne’e, iha kandidatu rihun sanulu atus-lima sianulu resin-hitu (10.597) mak aprovadu no kandidatu rihun rua atus-rua hitunulu resin-hitu (2.277) mak la aprovadu. Husi numeru aprovadu ne’e fó prioridade ba kandidatu atus haat (400) ne’ebé tuir kouta kada Munisipiu mak sei ba teste médiku.” Hatutan Porta-voz HAK
Porta-voz afirma, situasaun ne’e sai polemika iha públiku no hetan reasaun maka’as husi kandidatu sira tanba konsidera naran aprovadu hotu iha lista, maibé la admiti ba teste mediku. Iha indikasaun forti mós lista kadetes foun sira neʼebé aprovadu ba teste mediku maioria oan husi superior PNTL sira.
“Ami rekomenda no husu ba Ministeriu Interior no PNTL imediatamente atu anula dejisaun. Aleinde ne’e nafatin alerta ba PDHJ imediatamente atu halo investigasaun ne’ebé kle’an hodi hatene tendensia ba pratika sira ne’ebé kontra prinsipiu Boa Governasaun iha Timor-Leste.” Afirma Porta-voz HAK, Marina Galucho
Porta-voz informa, ba Parlamentu Nasionál Komisaun B ne’ebé trata asuntu Negósiu Estranjeiru, Defeza ho Seguransa atu halo fiskalizasaun ba prosesu rekrutamentu ne’ebé iha tendensia kontra prinsipiu Boa Governasaun nian.
Esplika liután HAK fiar katak rekrutamentu PNTL neʼebé la’o ho padraun di’ak no kredível sei kontribui ba hari’i forsa polísia ne’ebé profesionál, disiplina no respeita ba prinsipiu direitu umánus. Apresia ba kandidatu kadetes Foun PNTL ne’ebé hatudu maturidade ba buka lia los no justisa ho dalan legal nomos demokratiku.
Reportajen : Nelfiano
Foto : Nelfiano