Dili, 20 Fevereiru 2026 (Média Democracia) – Polísia Nasionál Timor-Leste (PNTL) liuhusi Komandu Pesoa Formasaun Polísia Nasionál Timor-Leste submete ona viza pesoál no kurikulum vitae Ofisiál Superiór na’in 54 ba Komisaun Promosaun Tranzitóriu Ministériu Interior.
Komandante Komandu Pesoa Formasaun Polísia Nasionál Timor-Leste (PNTL) Superintendente Xefe Polísia Arquimino Ramos hateten, dadaun ne’e husi Komandu Pesoa Formasaun submete ona viza pesoál no Kurikum Vitae Ofisiál Superiór nian ba Komisaun Promosaun Trazitóriu Ministeriu Interiór atu halo promosaun.
“Ita foti ona sira viza pesoál, no sira nia Kurikulum Vitae hodi envia ona ba iha Gabinete Exelensia Ministru Interiór nian, tanba Komisaun Promosaun Trazitóriu prezide husi Xefe Gabinete Ministeriu Interiór.” Dehan Arquimino ba jornalista sira iha nia kna’ar fatin Batallaun Orden Públiku (BOP) Caicoli kinta (19/02).
Promosaun trazitóriu ne’ebé Governu sei halo ba membru PNTL ofisiál superiór ne’e, kompostu husi deviza Superintendente Asisténte antiguidade sei promove ba deviza Superintende Polísia.
“Husi deviza Superintendente Polísia ho antiguidade sei promove ba deviza Superintende Xefe Polísia no husi Postu Superintendente Xefe Polísia sei promove ba Komisáriu Asisténte ka fitun ida, husi deviza Superintendente Asisténte Polísia to’o Superintendente Xefe ho antiguidade ne’ebé atu promove ne’e iha 54 pesoas mak ita manda ona ba Gabinete Exelensia Ministru ninian.” Hatutan Arquimino
Superintendente ne’e afirma, modalidade ba promosaun ne’e Ministériu Interiór mak prepara sei lori ba Konsellu Ministru hodi hetan aprovasaun no bainhira hetan ona aprovasaun mak komandu sei hetan fali orientasaun hodi lori ba promosaun.
Komandante Komandu Pesoa Formasaun ne’e informa, promosaun sei halo iha fulan ne’e ka fulan oin, tanba ne’e depende ba desizaun Konsellu Ministru, hafoin desizaun KM mak foin deside loron promosaun halo iha loron no fulan saida.
“Ami-nia Komandu Pesoa Formasaun kompeténsia mak prepara dadus sira, CV sira hetan no manda tiha ona ba Gabinete Exelensia Ministru Interiór nian liuliu ba Xefe Gabinete hanesan Prezidente Komisaun Promosaun Trazitóriu.” Informa Arquimino
Iha biban ne’e Arquimino mós relata katak, husi Komandu Pesoa Formasaun mós aprezenta ona dadus ba lista ajente sira-nian iha komisaun promosaun trazitóriu nian ne’ebé prezidente husi Xefe Gabinete Ministru Interiór atu halo promosaun.
“Agora ita fahe ona formuláriu ba ajente sira ne’e no kompetensia Komandu Pesoa Formasaun ne’e fornese de’it dadus viza pesoál nomos ho sira-nia avaliasaun dezempeñu sira, nune’e ita manda hotu ba Sekretáriadu promosaun trazitóriu.” Afirma Komandante Komandu Pesoa Formasaun Polísia Nasionál Timor-Leste (PNTL) Superintendente Xefe Polísia Arquimino Ramos
Enkuantu, dadaun ne’e lista iha ona Gabinete Sekretáriadu promosaun trazitóriu Ministeriu Interiór. Ministru Interior aprova aprezenta ba Konsellu Ministru mak Komandu foin halo promosaun.
Reportajen : Estefania
Foto : Estefania