Dili, 29 Abril (Media Democracia)- OXFAM Timor Leste realiza atividade kona-ba programa HAKBI’IT Asaun koletivu ba equaldade no inkluzaun iha Timor Leste liuhusi atividade ROMANSA (Rai Osan ba Mudansa), haksolok atu konvida ita-boot atu partisia iha eventu Faseout, ne’ebé Marka momentu importante, viajen hamutuk ho parseiru, membru grupu ROMANSA no OXFAM hodi empodera feto liuhusi Rai osan, emprestimu no inkluzaun finanseira.
Tuir Diretor OXFAM Timor Leste, Pankaj Anad hatete programa HAKBI’IT ne’e iha faze ikus, no objetivu mak atu empodera feto sira hodi hadi’a ekonomia familia nian.
” Programa HAKBIIT Ida ne iha faze ikus mak ne’e, programa HAKBIIT implenenta iha 2020 to 2026 iha ne’e ita iha parseiru sira husi Oecusse, Atauru, Likisa nomos Suai. Programa HAKBI’IT ne’e nia objetivu mak empodera feto maluk sira hadi’a ekonomia familia nian nomos iha sosiedade nia laran, Hau hakarak rekonese ba parseiru sira hanesan AFFOS, BIFANO, MANEO, KSI, no RHTO” Dehan Diretor OXFAM Timor Leste iha Timor Plaza Dili
Diretor ne’e mos hatutan katak sistema aprendizajem Asaun Jeneru (GALS), ne’e implementa iha sosiedade ho objetivuatu feto ho Mane bele hatene nia kna’ar no bele komprende malu no kria planu ba futuru.
” Sistema Aprendizajem Asaun Jeneru (GALS), ne’e implementa iha familia ida nia laran ho objetivu atu feto ho Mane hatene nia kna’ar no bele komprende malu nomos kria planu familia nian no la’o ba oin liutan, no Rai Osan ba Mudansa ida ne’e grupu husi komunidade sira rai osan semana ida dala ida maibé sira mos buka osan atu rai no bele hadi’a sira nia uma laran” Dehan Diretor OXFAM TL.
Alende ne reprezentante grupu Binibu Faef Nome ( BIFANO ), Felizberto de Deus, afirma durante seida’uk inklina aan iha grupu, sempre deskonfia malu maibé bainhira inklina aan iha grupu ami la deskunfia malu ona.
” Iha 2003 to’o 2006 ha’u fa’an karau husi Oecusse Mai Dili, maibé bainhira hau f’aan karau no osan ne’ebé ema hola, ha’u lori fali ba Oecusse maibé Osan ne’e gastu ba saida de’it ami la hatene derepente deit Osan nee hotu ona. Depois ha’u para tiha fa’an karau ha’u kontinua fali sai karpinteiru maibé hanesan nafatin maibé iha 2020 ha’u ho ha’u nia parseiru komesa tama ona ba grupu ne’e no husi ne ami aprende rai osan no husi osan ne’ebé ami rai ami uza hodi selu oan sira nia eskola no ami planu atu halo Uma” dehan Felizberto de Deus iha Suai Room Timor Plaza.
Iha aktividade ne’e partisipa husi grupu ROMANSA lima (5) Mak hanesan BIFANO, AFFOS, MANEO, KSI, RHTO no estudante husi universidade UNITAL, IOB, UNITAL no UCT.
Reportajen : Nelia Freitas
Foto: Nelson Ferreira