Dili, 09 Juñu 2026 (Media Democracia)– Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) klarifika kazu suspeitu “na’ok” telefone ne’ebé rezulta Nadine Batista R.D. Carmo ho idade 15 no mate iha Praia dos Cuqueiros iha Domingu (7/6) foin lalais ne’e.
Suspeitu na’in rua ne’ebé deskonfia komete iha kazu ne’e, ekipa konjunta kaptura ona ho inisiál JACR, no MZX.
Portavós Komandu Jerál PNTL Superintendente Polísia João Belo dos Reis hateten, kazu na’ok iha área Prai dos Coqueiros ninian depois PNTL detein ona suspeitu na’in rua.
“Suspeitu nain-rua horseik ami kaptura iha oras meudia iha BTN Tasi Tolu.” Dehan Diretór Diresaun Servisu Inveatigasaun Kriminál João Belo ba jornalista liuhusi Konferénsia Imprensa ne’ebé halo iha Kuartel Jerál PNTL Caicoli, Tersa ne’e.
Belo informa, antes ne’e suspeitu nain-rua halo ona asaun loron tolu liu iha loja Gracia Kampung Baru nia kotuk, no motór ne’ebé sira uza hodi hadau sasán iha Praia dos Ckqueiros ne’e mós loron tolu liuba sira na’ok.
“Prosesu sira-ne’e ita sei akumula aprezenta ba Tribunál, agora sei iha ami-nia liman hodi detein ba 72 oras, depois de 72 oras ami submete ba Tribunál.” Nia haktuir
Nia esplika, suspeitu na’in rua ba kazu “na’ok” telefone ne’ebé rezulta Nandine lakon vida ne’e PNTL rejista ona ho NUC 0206/2026PNSIK .
“Pasta ne’ebé mak sira hadau iha fatin akontesimentu depois Motor ne’ebé sira uza ne’e ami mós informa ba públiku atu ema ne’ebé sente nia motor lakon iha loja Gracia nia kotuk iha loron tolu liuba atu mai fó informasaun ba lala’ok nia motor lakon.” Nia afirma.
Porta Voz PNTL haktuir, kazu ne’e kontinua halo investigasaun no dadaun ne’e investigasaun sei la’o hela.
“Ne’ebé ha’u labele esplika detallu sé sé mak sei bolu, maibé deklarasaun sira ne’ebé mak ita hetan husi sasin sira ita sei buka tuir nafatin atu hatene.” Nia adianta
Superintendente Xefe Polísia Joao Belo eaplika, kazu ne’ebé rezulta Nandine mate PNTL kontinua husu Ministériu Públiku atu kontinua buka tuir ema ne’ebé envolve kazu ne’e tanba suspetadu suspeitu sira ne’e iha grupu tanba ne’e polísia kontinua buka tuir.
Tanba ne’e Diretór Diresaun Servisu Investigasaun Kriminál husu ba inan-aman sira atu eduka oan sira atu respeita ema seluk depois husu mós ba inan-aman sira se sente nunka sosa motor ruma ba nia oan sira maibé oan sira sai uza motor tenke buka tuir hodi hatene motor ne’e se nian.
” Nune’e ita labele halo toleransia ba oan sira nia asaun krime ne’ebé mak prejudika ema seluk nia direitu no ema seluk nia sasán.” Nia hakotu
Reportajen : Estefania Cardoso
Foto :Estefania Cardoso