Dili, 09 Juñu 2026 (Media Democracia)– Porta-voz Komandu Jerál PNTL Superintendente Xefe Polísia João Belo dos Reis, relata kona-ba kazu apreensaun ba sasán kontra bandu iha área Tibar, ne’ebé Autoridade Aduaneira (AA/ Alfándega) fó informasaun ba PNTL katak sira deskonfia kontetór 40 fit tama portu Dili ho dokumentu ne’ebé suspeita katak deskonfia buat ruma iha laran.
“Nune’e ami halo verifikasaun ba dokumentu hotu-hotu ne’ebé mak tama depois ita loke kontetór ita hetan manifesta atu hatama sasán ne’e kadeira meza maibé iha laran sigaru karton 830 mak iha laran, sigaru sira-ne’e sigarru ilegál la iha lisensa tanba ne’e Diresaun Servisu Investigasaun Kriminál lori sigarru ne’e mai halo identifikasaun hodi prosesu ba iha Ministeriu Públiku.” Dehan Porta-Voz PNTL João Belo ba jornalista liuhusi Konferénsia Imprensa ne’ebé halo iha Kuartel Jerál PNTL Caicoli, Tersa ne’e.
Porta-Voz ne’e informa, sigarru ne’e polísia deteta nia orijen husi Kambodia, produsaun sigarru ne’e sai nafatin preokupasaun tanba bai-bain sira tenta atu hatama husi pontu entrada rai maran sira-ne’e.
“Maibé labele entaun sira tenta atu hatama fali husi Tibar, na’in ba sasán orijen husi Xina mak mai, maibé iha kompañia Timor-oan ida ho inisial BM mak importa mai Timor-Leste.” Nia haktuir
Diretór Servisu Investigasaun Kriminál hateten, Timor-oan ida ho inisial BM Polísia bolu ona mai no halo hela identifikasaun.
“Ita foin mak hetan ema na’in ida depois ita halo tracking nafatin ba sese mak iha laran ita sei bolu hotu mai hodi responsabiliza ba nia asaun ne’ebé sira halo.” Nia informa
João Belo dos Reis, sasán kontra bandu sira ne’e Diresaun Servisu Investigasaun Kriminál halo identifika no entrega ba Ministeriu Publika ne’e atu destroi ka atu lelaun ne’e kompetensia MP nian.
“Ami nia kna’ar mak identifika prosesu investiga pois aprezenta ba Ministeriu Públiku.” Nia adianta
Entretantu, kazu ne’e rezista ona ho númeru NUC 0207/ PNSIK.
Reportajen : Estefania Cardoso
Foto :Estefania Cardoso