Dili, 16 Juñu 2026 (Media Democracia)- Martinho de Jesus Soares, husi Munisípiu Ermera, Postu Administrativu Hatulia-A, Suku Manusae, Aldeia Bauana, agora dadaun hela iha Suco Kuluhun Aldeia Has laran, hanesan negosiante faan bandeira ba nasaun sira hanesan Portugal, Brazil, Argentina no Fransa no seluk tan iha area Palacio Govrnu nia oin
Foinsa’e Martinho De Jesus hateten durante fa’an bandeira iha mós kompradór bandeira nasaun sira hanesan Portugál no Arjentina sai produtu ne’ebé adeptu futeból barak mak sosa hodi hatudu apoiu ba sira nia ekipa favoritu
“Kada loron, depois husi eskola, ha’u kontinua fa’an Bandeira komesa husi tuku 2 lokraik to’o tuku 8 kalan, Husi negosiu ki’ik ne’e, dala barak ha’u bele hetan to’o US$10 husi loron ida, maske dala ruma menus husi ne’ebá, nune’e ha’u nia planu husi faan sigaru pulsa to’o ohin loron ha’u kontinua fa’an bandeira ne’e desde tinan 2019, Iha tempu ne’ebá ha’u hahú ho fa’an paun, no osan ne’e mak tau hamutuk to’o US$ 50.00 dolar mak ha’u uza fila fali hodi kontinua halo negosiu fa’an Sigaru no agora fa’an tan Bandeira, bainhira kompetisaun Kopa Mundiál hahú” Dehan Martinho iha Palacio Prezidente nia oin Quarta 16/06/2026
Maske nune’e, nia nafatin agradese no kontente ho rezultadu loron ida nian, ne’ebé hetan durante fa’an bandeira iha kompetisaun kopa mundial tinan ne’e
“Osan ne’ebé hetan loron-loron husi fa’an bandeira no sigaru mak ha’u uza hodi selu eskola no kos, dadaun ne’e ha’u hanesan estudante ESTV 28 de Novembro classe 3° ano husi departamento Electronika no ha’u iha planu atu kontinua ba nivel universitáriu depois remata ha’u nia estudu iha Secundariu atu bele lori rezultadu di’ak ba família liuliu ba ha’u nia pai ho mãe, maski seidauk bele fó buat boot, ha’u prontu atu halo inan no aman kontente ho buat ki’ik sira ne’ebé ha’u bele halo” Nia informa
Martinho mós husik hela mensajen ba joven sira, hanesan joven tenke foku liuba atividade sira ne’ebé bele lori benefísiu ba família no futuru rasik
“Ha’u nia mensajen ba ba kolega sira la bele hanoin de’it problema, tanba problema la fó benefísiu ba família, ita rasik mak tenki halo inan no aman kontente, tenki sai joven ne’ebé di’ak ba família no hanoin sakrifísiu ne’ebé inan no aman halo ba ita.” Nia fo hanoin
Ho grasa maromak nian Martinho de Jesus Soares espera katak iha futuru nia bele alkansa objetivu sira no kontribui liu tan ba nia família no sosiedade
Reportajen : Estajia Juliana no estajiada Baquita
Foto : Juliana