Dili, 17 Juñu 2026 (Media Democracia)- Komandante Komponente Forsa Naval, FALINTIL Forsa Defeza Timor-Leste (F-FDTL), Comodoro Higino das Neves “SUPER-MAN”, ho delegasaun ofisiál sira partisipa iha Expo Marítima Militar Internasionál FLOT-2026 iha Kronstadt, São Petersburgo, Federasaun Rusia, husi loron 9 to’o 14 Juñu 2026.
Objetivu prinsipal husi partisipasaun ne’e, atu hametin relasaun amizade no kooperasaun marítima militar, aumenta koñesimentu kona-ba teknolojia naval modernu no buka oportunidade ba edukasaun, treinamentu no dezenvolvimentu kapasidade Componente Naval F-FDTL.
Iha loron 11 fulan Juñu nu’udar momentu importante iha vizita ne’e, bainhira Comodoro Higino das Neves “SUPER-MAN” partisipa iha reuniaun ho Comandante Mariña Federasaun Rusia no Xefe delegasaun naval hosi nasaun 26.
Durante enkontru, sira diskute kona-ba seguransa marítima, koperasaun entre mariña sira no oportunidade atu hametin kapasidade institusionál.
Hafoin reuniaun Komodoru Higino das Neves “SUPER-MAN” mós troka prendas ho Comandante Marinha Federasaun Rusia nu’udar símbolu amizade no respeitu, hatudu relasaun di’ak no espírito koperasaun entre instituisaun rua.
Aleinde ne’e, delegasaun Timor-Leste mós vizita exibisaun ekipamentu naval modernu, sistema defeza marítima, no instituisaun edukasaun naval importante sira iha Rusia, inklui Akademia Naval no Eskola Naval Nakhimov.
Iha Partisipasaun ida ne’e, refleta kompromisu Falintil-Forsa Defeza Timor-Leste (F-FDTL), atu kontinua dezenvolve kapasidade profesional no operasional Componente Naval, liu husi aprende, troka esperiénsia no hametin koperasaun ho nasaun parseiru sira.
Fontes Informasaun: Pájina Ofisiál, Relação Informação Públicas FALINTIL-Forsa Defeza Timor-Leste.