Dili, 18 Juñu 2026 (Media Democracia)- Ministériu Saúde hamutuk ho UNICEF realiza enkontru dahuluk hodi estabelese Grupu Servisu Kualidade Bee nian iha Timor-Leste. Enkontru ne’e hanesan pasu inísiu ba koordenasaun entre parte relevante sira hodi asegura bee moos no seguru ba populasaun, liuliu ba labarik inklui feto sira iha área rural no urbana.
Tuir Xefe Departamentu Kontrolu Vektor no Saúde Ambiental (DCVSA), Elizario Soares Lopes hateten enkontru ne’e kona-ba progresu servisu sira ne’ebé kada liñas ministeriais halo ona hodi mai relata fila fali progresu sira durante fulan tolu no fulan haat iha ministériu ida-idak nia papél halo ona liga ho bee moos.
“hanoin kontrolu ne’ebé nia sistema fontes bee to’o mai iha konsumidores bazeia ba padraun Organisasaun Mundial Saude (OMS) katak ita tenki identifika mós fontes bee to’o mai iha distribuisaun ita-nia komunidade sira uza, ami garantia kualidade be’e ba populasaun tomak iha Timor-leste labele hetan moras diaria tipus no moras sira seluk, relasiona ho kontamina bee nian.” Dehan Elizario Lopes ba jornalista sira iha Salaun Kofi Anan, Rezidénsia ONU, Caicoli Kinta ne’e (18/06).
Xefe Departamentu Elizario Lopes afirma katak, grupu ne’e estabelese oinsá atu ko’alia kona-ba tarefas servisu sira inklui ministériu saúde asetu asegura saúde públiku ba komunidade hotu iha rai laran.
“atu estabele grupo ne’e ida mak oinsa ita atu koalia kona-ba tarefas servisu kada linhas ministeriais ida-idak nian hanesan ohin ita hatene papel no responsavel ministeriu saude oinsa asegura ita nia saude publiku ba ema hotu, ema ne’ebe iha Diretora jeral koalia kona-ba saneamentu siensia hijeni no kona-ba bem estar nia povu tomak iha Timor-Leste.” Nia afirma
Iha fatin hanesan, Xhefe Seksaun Bee, Saneamentu no Ijiene UNICEF, Yume Yorita, haktuir, bee ne’ebé saudável mak hemu bee seguru no bele fó moris ba labarik
“Bee-hemu ne’ebé seguru no konfiável maka fundamentál ba saúde públika, sobrevivénsia labarik nian, no dezenvolvimentu sustentável. Enkuantu Timor-Leste halo ona progresu ne’ebé di’ak tebes hodi habelar asesu ba servisu bee nian, asegura katak bee ida-ne’e seguru no ho kualidade di’ak, sai nafatin dezafiu ida ne’ebé krítiku.” Dehan Yume
Xhefe Seksaun Bee, Saneamentu no Ijiene UNICEF ne’e adianta katak hanesan ema hotu hatene daudaun ne’e seidauk iha dadus publikadu kona-ba estatutu kualidade bee nasaun nian.
Tanba ne’e estabelesimentu Grupu Servisu ba Kualidade Bee ne’e hatudu kompromisu konjunta iha asaun koordenasaun, bazeia ba evidénsia, no multisetoriál hodi halibur parte interesada xave sira iha plataforma ida nia laran, hodi bele hametin sistema monitorizasaun, harmoniza padraun no abordajen sira, asegura katak dadus informa polítika no prátika ne’e ho efetivu.
Reportajen: Novita Soares, Baquita Marcal
Foto: Baquita