Dili 07 Jullu 2026 (Media Democracia)- Governu konstitusionál da-sia ofisialmente lansa ona konstrusaun Biblioteka Nasionál, Projetu ne’e hanesan investimentu ida ba futuru Timor-Leste nian, hodi fo espasu aprendizajen ba estudante sira.
Vise Primeiru Ministru, Ministru Koordenadór Asuntu ekonomia no Ministru Turismu, Francisco Kalbuadi Lay, konsidera konstrusaun Biblioteka Nasionál hanesan Investimentu ida ba Timor-Leste nia futuru. Oinsa prezerva memória nasionál, hametin edukasaun no peskiza, no hatutan istória no kultura nasaun nian ba jerasaun sira.
“Ohin hanesan momentu importante ida, laos de’it lansamentu konstrusaun foun ida, maibé hanesan investimentu ida ne’ebe sei prezerva ita nia memória nasionál, apoiu edukasaun no investigasaun fornese ba jerasaun futuru sira asesu ba koñesimentu no istória ita nia nasaun nian,” Dehan Vise-PM hafoin halo diskursu iha lansamentu Biblioteka Nasional, iha Bairo Pite, segunda (06/07).
Nia afirma, Biblioteka Nasionál ka’er signifikativu ba Timor-Leste, nasaun joven ida ne’ebé hetan independénsia liu husi nia povu nia luta naruk. No povu Timor-Leste luta ba independénsia la’ós de’it atu harii nasaun soberanu ida, maibé mós atu proteje sira nia identidade, lian, kultura, no memória nasionál.
“Biblioteka Nasionál sei hala’o kna’ar vital ida hodi kumpri responsabilidade ida-ne’e, Biblioteka Nasionál ne’e sei prezerva patrimóniu dokumentál nasaun nian no fó espasu ba estudante, peskizadór, profesór, hakerek-na’in, no públiku en-jerál atu aprende halo peskiza no deskobre koñesimentu foun no biblioteka ne’e sei ajuda prezerva istória luta nasionál nian, kultura ne’ebé riku, no ideia oioin ne’ebé forma povu Timor nia moris.” Nia Dehan
Enkuantu nia subliña, dezenvolvimentu nasionál la’ós de’it relasiona ho konstrusaun estrada, ponte, portu, no infraestrutura públika oioin. Maibe dezenvolvimentu nasionál presiza mós investimentu iha edukasaun, kultura, koñesimentu, no memória nasionál.
“Instituisaun sira ne’ebé forte ajuda ita atu komprende istória, hametin ita nia identidade, no prepara ba futuru. Tanba ne’e maka biblioteka nasional hanesan projetu ida ne’ebé importante tebes ba ita nia nasaun. Lansamentu konstrusaun biblioteka nasionál nu’udar rezultadu husi prosesu planeamentu ne’ebé naruk, preparasaun téknika, no kolaborasaun entre instituisaun oioin. Parseria ne’e hatudu ona oinsá investimentu iha setór petrolíferu bele kontribui mós ba dezenvolvimentu iha tempu naruk ita nia nasaun nian,” Kalbuadi Lay hatutan
Nia afirma katak, Biblioteka Nasionál hein atu enkoraja kultura lee, kriatividade, no inovasaun, enkuantu garante katak koñesimentu no tradisaun povu Timor nian hetan protesaun no hatutan ba jerasaun sira iha futuru.
Reportajen: Tomás dos Santos
Foto : Tomás dos Santos