DILI- 10 Jullo 2026 Media Democracia – Salostiano Castro Perreira, joven ho idade tinan 20 husi Munisípiu Baucau, Postu Administrativu Laga, Suku Sagrate, Aldeia Aiasula, dadaun ne’e hala’o moris nu’udar negosiante ki’ik iha kapitál Díli. Lorloron nia hela iha Jardim Largo Lecidere ho nia karosa, hodi fa’an sasán atu sustenta nia moris no buka futuru di’ak liutan.
Salostiano hatete bainhira nia hahú mai iha iha kapital Díli, nia laiha buat ida. Nia la iha fatin hela no osan ne’ebé nia lori mak osan oituan de’it $100 atu hahu nia negósiu ki’ik.
“Husi montante $100 ne’e, ha’u fahe ba $60 atu sosa karosa ida no $40 atu sosa nu’u hodi fa’an. nu’u ida nia sosa ho folin sentavu 0,50 no fa’an fila fali ho folin $1, nune’e bele hetan lukru ki’ik atu sustenta nia moris lorloron nian”. dehan Salostiano, iha Jardim Largo Lecidere, Díli, (8/07/2026.
Nia reafirma tanba seida’uk iha uma ka fatin hela, durante kalan sira nia deskansa de’it iha jardim públiku sira iha Díli. Maski enfrenta difikuldade barak, Salostiano kontinua servisu maka’as ho esperansa katak nia negósiu bele dezenvolve no hadi’a nia moris iha futuru.
Maske hasoru difikuldade iha moris lorloron, fa’an- nu’u nafatin halo esforsu dudu karosa ba mai iha kapitál Díli atu buka rendimentu hodi sustenta família. Rendimentu ne’ebé hetan kada loron la permanente, maibé nafatin suficiente atu ajuda nesesidade bázika família nian no kontinua negósiu ki’ik ne’e.
” kada loron ha’u hahu fa’an iha jardim sira ka dudu karosa ba fatin sira atu ema bele sosa. bainhira di’ak, loron ida ha’u bele hetan entre US$20 to’o US$15. Maibé se menus, dala ruma ha’u hetan de’it US$5. Hotu-hotu depende ba ema sira ne’ebé mai sosa. Osan ne’e ha’u uza atu sustenta família iha uma no sosa fila-fali hahan atu kontinua halo negósiu,” nia esplika.
Nia subliña tan katak, dezafiu boot ne’ebé negosiante fa’an nu’u sira hasoru mak laiha fatin permanente atu hala’o atividade komersiál. Tanba operasaun husi ekipa SEATOU ne’ebé dala barak hasai ami husi fatin fa’an mos fo impaktu direto ba rendimentu.
“Hanesan negosiante fa’an nu’u, dala barak ami sente triste tanba ekipa SEATOU sempre mai hadau ami nia nu’u no husik ami sai husi fatin fa’an. Tanba ne’e, ami tenke buka fali fatin seluk atu kontinua fa’an, tanba to’o agora seida’uk iha fatin permanente ba ami,” nia afirma
Alende ne’e nia mos rekomenda ba juventude no ba parte relevante sira atu fó apoiu ba atividade negosiu ki’ik. Nia husu ba joven sira atu labele depende de’it ba inan-aman, maibé tenke iha inisiativa atu buka moris rasik liuhusi servisu no empreendedorizmu.
Reportagem : Estajiáriu lourenço Raimundo Soares
Foto : : lourenço Raimundo