Dili, 17 Jullu 2026 (Media Democracia)- Tribunál Judisiál Primeira Instánsia Díli (TJPID), iha Kinta kalan (16/07), liuhusi prosesu primeiru interogatóriu, hatun despaixu hodi aplika medida kausaun ho osan US$10.000 ba jerente kazu online scam call center iha área Ulmera, no medida kausaun ho osan US$2.500 ba kada arguidu hamutuk ema nain-75, tanba suspeita envolve iha atividade kriminál refere.
Durante prosesu Primeiru Interogatóriu, arguidu sira hili direitu nonok. Tribunál deside aplika medida kausaun Termu Identidade no Rezidénsia (TIR), Aprezentasaun Periódika no Proibisaun Auzénsia. Alende ne’e, Tribunál mós aplika medida kausaun ho valor US$10.000 ba jerente jogu online ne’ebé deskonfia envolve iha kazu Scam Call Center, enkuantu ba arguidu seluk hamutuk na’in-75, Tribunál aplika medida Kausaun ho valor US$2.500 ba kada arguidu.
Tribunál mós deklara, medida Kausaun ba arguidu sira, tenke kumpre obrigasaun ne’e, iha prazu loron 20 nia laran, hahú husi data ne’ebé despaixu tribunál hatún, medida kausaun Aprezentasaun Periódika, Tribunál ordena arguidu sira atu aprezenta-an iha Postu Polísia ne’ebé besik ho sira-nia hela fatin, fulan ida dala rua, tuir termu no kondisaun ne’ebé Tribunal estabelese.
Defeza ba arguidu sira, Advogadu Henrique Mariz, hateten liuhusi despaixu ne’ebé Tribunal hasai horkalan, Tribunal aplika medida kausaun tolu no medida Kausaun ba arguidu hamutuk nain-76. Husi total ne’e, Tribunal aplika medida Kausaun ho valor US$10.000 ba arguidu nain-ida, enkuantu arguidu seluk nain-75 simu medida Kausaun ho valor US$2.500 kada ema.
“Iha medida kausaun Aprezentasaun Periodika, Medida Proibisaun Auzensia no medida Kausaun ba arguidu sira. Iha despaixu ida ne’e menus liu ona, tanba antes iha alegasaun Ministériu Públiku nia husu Tribunal aplika medida Kausaun ba Manajer ne’e $10 mill.” Advogadu Henrique dehan ba Jornalista sira, iha Tribunal Judisial Primeira Instansia Dili, Kinta kalan (16/07).
Nia dehan, arguidu nain-75 ne’e husu medida prestasaun Kausaun $2,500 durante prazu loron 20 nia laran, inklui medida koasaun Termu Identidade Rezidensia, ne’ebé mak antes ne’e autoridade seguransa aplika ona ba arguidu sira.
Antes ne’e, iha alegasaun Ministériu Públiku, ne’ebé reprezenta hosi Prokurador Domingos Gouveia, husu ba Tribunál atu aplika medida kausaun Aprezentasaun Periodika, medida Proibisaun Auzénsia no medida Kausaun ho osan US$10.000 ba arguidu D, ne’ebé hanesan jerente iha operasaun jogu online scam call centre.
Enkuantu ba arguidu seluk hamutuk nain-74, Ministériu Públiku mos solisita ba Tribunál atu aplika medida Kausaun ho osan US$5.000 ba kada arguidu.
Parte Defeza nia husu Tribunal atu aplika medida kausaun Aprezentasaun Periodika, medida Proibisaun Auzensia no medida Kausaun ho osan menus hosi $5 mill bazeia ba sira nia kondisaun ekonomika tanba sira ne’e foin to’o mai.
Rona tiha parte sira ne’e, Tribunal deside muda ba loron tuirmai (Kinta-feira), hodi rona despaxu.
Arguidu sira lori ba iha Tribunal Judisial Primeira Instansia Dili, bazeia ba NUC. 0248/26.PNSIK.
Ministériu Públiku halo promosaun ba arguidu nain-75 ne’e, hamutuk krime haat (4) hanesan Krime Jogu ilisitu, Asosiasaun Kriminoza, Burla informatika no krime Brankeamentu kapitais, tanba deskonfia komete kazu ilegal Scam Call Center.
Antes ne’e Polisia Nasionál Timor-Leste liuhusi Diresaun Servisu Investigasaun Kriminal (DSIK), hamutuk ho Diresaun Servisu Informasaun Polísia (DSIP) iha Polísia Nasional Timor-Leste (PNTL), detein sidadaun estranjeiru hamutuk nain-75 ho flagrante delitu ba alegasaun pratika online scaming game ilegal iha área Kampu Baru, Munisípiu Díli.
Durante operasaun, ekipa identifika grupu boot ne’e utiliza teknolojia avansada hodi halo operasaun iha kapital Dili. Ekipa mós preende sira nia pasaporte iha área Ulmera Munisípiu Likisa ne’e, hamutuk Pasaporte 75, telemovel no osan balun.
Iha prosesu Primeiru Interogatoriu ne’e, Prezide hosi Juiz turnu, José Maria Ministériu Públiku reprezenta Prokurador, Domingos Gouveia, arguidu nain-76 hetan asistensia legal hosi Defensor Públiku, Henrique Mariz
Reportajen: Estefania Cardoso
Fotp: Estefania cardoso