Dili 17 Jullu 2026 (Media Democracia)-Tribunál Judisiál Primeira Instánsia Dili (TJPID) iha Kinta-feira kalan (16/07) hatun despaixu aplika medida kausaun ho osan hamutuk US$2.500 ba kada arguidu, liuhosi prosesu primeiru interogatóriu, tanba suspeita envolve iha kazu online scam call center ne’ebé akontese iha área Kampung Baru.
Iha prosesu Primeiru Interogatóriu Judisiál, arguidu nain-14 uza sira-nia direitu atu hili nonok no la fó deklarasaun ba Tribunál, tanba ne’e tribunal deside aplika medida tolu ba arguidu sira hanesan obrigasaun atu halo aprezentasaun periódika semana ida dala rua iha Postu Polísia ne’ebé besik liu ba fatin hela, medida proibisaun auzensia, no medida kausaun ho valor US$2.500 ba kada arguidu ida-idak. Medida hirak ne’e aplika durante prazu loron 20.
Defeza ba arguidu sira, ne’ebé subtitui husi advogadu privadu, Januário Martins, hateten liuhusi despaixu iha prosesu primeiru interogatóriu, Tribunál deside aplika medida Proibisaun Auzénsia, Aprezentasaun Periódika no Kausaun ho montante osan hamutuk dolar amerikanu rihun rua atus lima nulu ($2.500) ba kada arguidu, tuir desizaun Tribunál.
“Medida Proibisaun Auzensia, medida koasaun Aprezentasaun Periodika semana ida dala ida Postu Polísia ne’ebé mak besik no medida Kausaun $2,500 ba kada ema ida.” Dehan Januário ba Jornalista sira, iha Tribunal Judisial Primeira Instansia Dili, Kinta kalan (16/07).
Antes ne’e, iha faze alegasaun, Ministériu Públiku, liuhusi Prokuradór João Marquez, husu ba Tribunál atu aplika medida kausaun Proibisaun Auzénsia no Aprezentasaun Periódika ba arguidu nain-rua, nomós medida Kausaun ho montante US$3.000 ba kada arguidu.
Enkuantu, parte Defeza la konkorda ho alegasaun husi Ministériu Públiku ne’ebé husu ba Tribunál atu aplika medida kausaun ho valor US$3.000 ba kada arguidu. Defeza argumenta katak montante ne’e aas liu no la tuir kapasidade ekonomia arguidu sira nian. Tanba ne’e, Defeza husu ba Tribunál atu konsidera hamenus valor medida kausaun ne’e, ho konsiderasaun ba kondisaun ekonomia arguidu sira.
Antes rona tiha alegasaun hosi parte rua, Defeza ba arguidu nain-14, liuhusi Advogadu Privadu Octavio Cardozo, hateten katak durante prosesu Primeiru Interogatóriu, nia kliente sira hili direitu nonok. Tanba ne’e, prosesu kontinua ba fase alegasaun, ne’ebé Ministériu Públiku no parte Defeza ida-idak aprezenta sira nia argumentu ba Tribunál.
Arguidu nain-14 hosi área Kampung Baru lori ba iha Tribunal bazeia ba NUC. 0247/26.PNSIK.
No Ministériu Públiku halo promosaun ba arguidu nain-14 ne’e, hamutuk krime haat (4) mak hanesan Krime Jogu ilisitu, Asosiasaun Kriminoza iha artigu, Burla informatika no krime Brankeamentu kapitais, tanba deskonfia komete kazu ilegal Scam Call Center.
Antes ne’e, Polísia Nasionál Timor-Leste (PNTL), liuhusi Diresaun Servisu Investigasaun Kriminál (DSIK) hamutuk ho Diresaun Servisu Informasaun Polísia (DSIP), detein sidadaun estranjeiru hamutuk ema nain-14 iha operasaun flagrante delitu, tanba alegadamente envolve iha atividade online scam no jogu ilegál iha área Kampung Baru, Munisípiu Díli.
No prosesu Primeiru Interogatoriu ba arguidu nain-14, prezide hosi Juiz turnu, Marculino dos Santos Oliveira, Ministériu Públiku reprezenta Prokurador, João Marquez, arguidu nain-75 hetan asistensia legal hosi advogadu privadu, Octavio Cardoso.
Reportajen: Estefania Cardoso
Foto: Estefania Cardoso