Dili, 24 Jullu 2026 (Media Democracia)-Tribunál Judisiál Primeira Instánsia Díli (TJPID), liuhusi prosesu Primeiru Interogatóriu, hatun despaxu hodi aplika medida kausaun Prizaun Preventiva ba arguidu nain-11 ne’ebé suspeitu envolve iha atividade ilísita online scam call center iha área Mota Ki’ik, Hera.
Durante prosesu Primeiru Interogatóriu, Tribunál hala’o uluk identifikasaun ba arguidu sira, no kontinua ba alegasaun Ministériu Públiku no parte Defeza, tanba durante prosesu arguidu sira uza sira nia direitu atu nonok durante interogatóriu.
Iha alegasaun ne’e, Ministériu Públiku, liuhusi Prokuradór titular Rafael Gusmão no Pedro Baptista, husu ba Tribunál atu aplika medida kausaun Proibisaun Auzénsia no medida Kausaun ho montante US$5.000 ba kada arguidu.
Maibé parte Defeza ba arguidu nain-11, liuhusi advogadu privadu João Serra, la aseita alegasaun Ministériu Públiku kona-ba pedidu atu aplika medida kausaun Proibisaun Auzénsia.
Defeza argumenta katak la iha evidénsia sufisiente atu sustenta suspeita krime ne’e, bainhira Tribunál konsidera presiza aplika medida Kausaun, Defeza husu atu fixa montante US$1.000 ba kada arguidu. Tuir Defeza, medida koasaun ne’ebé adekuadu no justu liu iha kazu ida-ne’e mak Termu Identidade no Rezidénsia (TIR).
“Juiza hatete katak arguidu na’in 11 ne’e ba prizaun preventiva, maibé ami hanesan defeza ami la konkorda no sei halo rekursu, desizaun ne’e ami respeita maibé ami sente katak desizaun ne’e polítika oitoan, maibé tenke sai desizaun jurídika, entaun ami la konkorda ba desizaun ne’e, juiza intende katak iha indísius, ami la konkorda, ami hanoin katak faktus no prova laiha.” Dehan João hofoin tribunal halo despaixo ba arguidu na’in 11 iha TJPID
Advogadu privadu ba arguidu na’in 11 ne’e dekkara katak sira sei iha prezu durante loron 15 hodi halo rekursu, nune’e semana sei halo rekursu ba kazu refere.
Maibé despaxu Tribunal nia aplika medida koasaun Prizaun Preventiva ba arguidu nain-11, tanba Tribunál konsidera katak iha indisius sufisiente.
Ministériu Públiku promove akuzasaun hasoru arguidu nain-11 tanba suspeita komete krime haat, hanesan krime Jogu Ilísitu, Asosiasaun Kriminoza, Burla Informátika no Brankeamentu Kapital. Akuzasaun ne’e tanba deskonfia katak arguidu sira envolve iha atividade ilegal online scam call centre.
Prosesu Primeiru Interogatóriu ne’e prezide husi Juíza turnu Ana Paula Fonseca. Ministériu Públiku reprezenta husi Prokuradór titular Rafael Gusmão no Pedro Baptis.
Reportajen : Estefania Cardoso
Foto : Estefania Cardoso