Dili, 07 Setembru 2026 (Média Democracia) – Prezidente Tribunál Rekursu, Afonso Carmona, hatete katak instituisaun ne’e prevee orsamentu besik US$4 millaun atu konstrui edifísiu Tribunál Judisiál Primeira Instánsia iha munisípiu lima, ho objetivu atu hadi’a infraestrutura no aumenta asesu públiku ba servisu justisa iha munisípiu sira.
Nia esplika, agora dadaun Tribunál Rekursu hatur ona fatuk dahuluk ba konstrusaun futuru instalasaun edifisiu Tribunál Judisiál Primeira Instánsia Vikeke, Baukau, Ermera, Bobonaru sei iha tempu badak, Suai no Oe-cusse.
“Husi konstrusaun sira ne’e kada Tribunál Judisiál Primeira Instánsia iha Munisípiu neen ita prevee millaun haat”, Prezidente Tribunál Rekursu Afonso Carmona hatete ba jornalista sira iha Tasi-Tolu segunda nee.
Nia dehan, ba tinan oin Tribunál Rekursu kontinua aposta ba konstrusaun Tribunál Judisiál Primeira Instánsia Munisípiu lima ne’ebé seida’uk instaladu.
“Tanba ne’e bazea ba lei organizasaun judisiál haktuir tenke estabelese Tribunál Judisiál Primeira Instánsia iha munisípiu hotu, tanba ne’e agora ita planu establese Tribunál Judisiál Primeira Instánsia neen, ita iha Munisípiu sanulu resin tolu, maibé Dili ita estabelese ona entaun ita tinan oin kontinua prevee osan establese Tribunál Judisiál Primeira Instánsia ba Munisípiu neen”, nia informa.
Nia hatutan, tanba servisu ida ne’e Tribunál nian ne’ebé lalika hakfodak prosesu la’o ona konstrusaun.
“Ne’ebé hanoin ida ne’e tama iha programa Governu nian, tanba ne’e mak ita hahú halo lansamentu fatuk dahuluk fizikamente agora ita lansa tiha, ita hahú ona servisu la’o ona”, nia hakotu.
Reportajen : Octaviana da Costa
Foto : Octaviana da Costa