Dili, 07 Setembru 2026 (Media Democracia) – Prezidente Tribunál Rekursu, Afonso Carmona, hamutuk ho Juízes Desembargadores husi Tribunál Rekursu, Juízes husi Tribunál Judisiál Primeira Instánsia Dili, Baucau, Suai no Oe-Cusse, inklui funsionáriu sira, presta omenajen ikus ba restu mortais Preladus Na’in-Haat iha Tasi-Tolu, Díli.
Preladus Na’in-Haat ne’ebé restu mortais sira lori mai Timor-Leste mak Bispu Dom Jaime Garcia Goulart, Bispu Dom Joaquim Ribeiro, Monseñor Martinho da Silva Lopes no Bispu Dom Alberto Ricardo da Silva.
Hafoin presta omenajen, Prezidente Tribunál Rekursu, Afonso Carmona, hato’o katak nia hamutuk ho juízes no funsionáriu sira mai Tasi-Tolu atu fó omenajen ba Preladus Na’in-Haat ne’ebé konsidera nu’udar figura importante iha istória Timor-Leste.
“Ohin ami hamutuk ho juízes sira no funsionáriu sira mai presta omenajen ba ita-nia bispu sira nia restu mortais iha ne’e. Ami konsidera sira nu’udar bispu sira ne’ebé halo ita-nia rai sai hanesan terra santa. Ha’u fiar katak sira na’in-haat ne’e santo ona,” dehan Afonso Carmona ba jornalista sira hafoin presta omenajen ba restu mortais Preladus Na’in-Haat iha Tasi-Tolu.
Nia hatete katak Preladus Na’in-Haat, liuliu Preladu Na’in-Tolu ne’ebé hala’o misaun iha Timor-Leste, iha kontribuisaun boot ba luta no dezenvolvimentu povu Timor-Leste, inklui prosesu ne’ebé lori nasaun ne’e sai ukun-án.
Tanba ne’e, nia konsidera importante atu povu Timor-Leste presta omenajen no valoriza sira-nia luta no kontribuisaun, liuhosi fó onra no reza ba sira, atu sira-nia klamar hetan fatin iha Maromak nia Reino.
Iha parte seluk, Prezidente Komisaun Organizadora, Padre Guilhermino da Silva, hatete katak desde restu mortais Preladus Na’in-Haat to’o Timor-Leste, komisaun fó oportunidade ba entidade sira iha nasaun, inklui Prezidente Repúblika, Prezidente Parlamentu Nasionál, Governu, Tribunál Rekursu no funsionáriu sira, atu presta omenajen ba Preladu sira.
“Ohin ita hahú fó omenajen ba Preladu sira iha Kapela Tasi-Tolu. Membru órgaun soberania sira ohin mak mai hato’o omenajen, tanba desde Preladu sira nia restu mortais to’o iha Timor-Leste, iha loron 02 Setembru, restu mortais sira seidauk kompletu iha fatin ida,” esplika Padre Guilhermino.
Nia hatutan katak iha loron sira liubá, restu mortais Monseñor Martinho Lopes lori ba vizita Manatutu no Laleia durante loron rua, enkuantu restu mortais Dom Jaime Garcia Goulart mós lori ba vizita iha INSFIT Fatumeta. Tanba ne’e, Preladus Na’in-Haat seidauk kompletu iha Tasi-Tolu.
“Tanba ohin restu mortais Preladu sira kompletu fali ona iha ne’e, komisaun autoriza órgaun soberania sira atu mai presta omenajen ba Preladu sira,”nia hakotu.
Ekipa Kobertura – Media Democracia