Dili, 08 Setembru 2026 (Media Democracia)- Unidade Polísia Marítima iha Segunda kalan (08/09) halo apreensaun ba Ró ida tanba halo peska ilegál iha área tasi timor nian.
Tuir Komandante Unidade Polísia Marítima, Superintendente Xefe Polísia, Eugénio Perreira hatete, operasaun ne’ebé UPM eskolla halo porvolta oras 20:00 konsege deteta katak iha ró ida halo peska ilegál too mai iha área tasi Behau nian, nune’e ekipa halo apreensaun ba Ró referida, nune’e asegura ho fraglante delitu.
Hafoin halo apreensaun, ekipa lori kedas suspeitu na’in lima ba detein iha Kuartel Unidade Polisia Marítima hodi halo identifikasaun tanba suspeitadu prátika atividade peska ilegál iha tasi Timor.
Suspeitu na’in lima husi nasaun orijen Xina ho inisiál TJ, HZT, HZ,TA no TFL. Ró ne’e dadaun ne’e husi Unidade Polisia Marítima foti ona iha Behau hodi lori mai iha Kuartel Unidade Polisia Marítima.
Dadaun ne’e Servisu Investigasaun Kriminál DSIK mak halo hela prosedimentu investigasaun ba suspeitu sira ne’e.
“Ami asegura hela, Prosesu ne’e suspeitu na’in lima agora detein hela iha sela no agora sira Investigasaun Kriminál mak halo hela prosesu.” Dehan Komandante UPM Eugénio Pereira ba jornalista liuhusi Via Telefone.
Nia informa, atu komprova ba sira-nia aktu krime ba prátika peska ilegál ne’e labele ko’alia tanba sei iha prosesu investigasaun.
Reportajen : Estefania Cardoso
Foto : Estefania Cardoso