Dili, 11 Setembru 2026 (Média Democracia) – Fronteira bele fahe rai, maibé la konsege fahe fuan. Ida-ne’e sai prova liuhusi kompetisaun internasionál Off-Road Timor-Leste no Nusa Tenggara Timur (NTT), Indonézia, ne’ebé transforma rai-rahun sai ponte ba amizade entre povu Timor-Leste no NTT.
Kompetisaun ne’e sei hala’o iha Arena Cristo Rei, ne’ebé sei sai fatin ba partisipante na’in-28 husi nasaun rua atu desafia malu iha dalan foho ne’ebé difísil. Maski troféu no premiu sai parte importante husi kompetisaun, objetivu prinsipál eventu ne’e mak hametin liután relasaun amizade, kultura no fraternidade entre povu Timor-Leste no NTT.
Prezidente Komisaun Organizadóra Off-Road 2026, Daniel Sword Gusmão, hateten katak eventu ne’e la’ós atu dezenvolve de’it desportu Off-Road, maibé mós atu promove amizade no kooperasaun entre Timor-Leste no NTT.
“Eventu ne’e mós atu promove relasaun amizade no kooperasaun ne’ebé besik liután entre Timor-Leste ho ita-nia viziñu sira iha Nusa Tenggara Timur,” Daniel Sword Gusmão hateten ba jornalista sira iha Timor Lodge, Kuarta-feira kalan (09/09).
Nia esplika katak kompetisaun ne’e la’ós de’it eventu motorsport ida, maibé mós sai oportunidade atu dezenvolve desportu Off-Road iha futuru, no hametin relasaun entre Timor-Leste no Indonézia.
“Ami nia razaun kria plataforma motorsport la’ós de’it atu habelar Off-Road, maibé mós atu promove amizade no kooperasaun entre Timor-Leste no Indonézia,” nia hateten.
Nia hatutan katak kompetisaun ne’e sei envolve Off-Roader na’in-28, kompostu husi partisipante Timor-Leste na’in-11 no partisipante husi Nusa Tenggara Timur na’in-17.
Iha parte seluk, Diretór-Jerál MNEK, Armindo Simões, hateten katak eventu ne’e hanesan eventu internasionál ida ne’ebé bele sai ponte atu kesi povu husi nasaun rua.
“Ba eventu ida-ne’e, ita iha komunikasaun di’ak ho Konsuladu Timor-Leste iha Kupang no Ajénsia Konsulár iha Atambua, atu fasilita partisipante sira husi Indonézia bele liu fronteira mai Timor-Leste,” nia dehan.
Nia hatutan katak eventu ne’e la’ós atu buka manán ka lakon de’it, maibé atu hametin liután relasaun bilateral entre governu no governu, liuliu entre Timor-Leste no Nusa Tenggara Timur.
“Eventu ida-ne’e ita bele lori ita-nia kultura no hatudu ba sira katak ita sai hanesan nasaun ida ne’ebé modelu ba rekonsiliasaun. Entaun, liuhusi eventu desportu ida-ne’e, ita bele hametin liután ita-nia amizade entre NTT no Timor-Leste,” nia esplika.
Aleinde ne’e, Koordenadór-Jerál Kompetisaun Off-Road, Tony Lopes, esplika katak kompetisaun ne’e sei fahe ba klase no kategoria oioin.
“Ita iha klase hitu no iha mós klase extra ida. Kategoria sira inklui Free for All, kategoria feto, 0 to’o 1.600 CC, Under, Medium 0 to’o 2.500 CC, klase 4×4 no Free for All,” nia afirma.
Kona-ba premiu, Tony Lopes hateten katak vencedór sira iha klase diferente sei simu troféu, medalla no osan premiu tuir pozisaun ne’ebé hetan.
Ba Klase 4×2, primeiru lugar sei hetan US$300, segundu lugar US$200, terseiru lugar US$75 no kuartu lugar US$50.
Ba Klase Free for All Feto, primeiru lugar sei hetan US$500, segundu lugar US$300, terseiru lugar US$200, kuartu lugar US$100 no kintu lugar US$75.
Enkuantu ba Klase Internasionál 0 to’o 1.600 CC, primeiru lugar sei hetan US$1.000, segundu lugar US$500, terseiru lugar US$150 no kintu lugar US$100.
Ba Klase Internasionál 0 to’o 2.500 CC, premiu sei distribui tuir pozisaun vencedór sira, ho primeiru lugar US$1.000, segundu lugar US$500, terseiru lugar US$150 no kintu lugar US$100.
Enkuantu ba Klase Open/4×4, primeiru lugar sei hetan US$1.000, segundu lugar US$500, terseiru lugar US$250, kuartu lugar US$150 no kintu lugar US$100.
Kompetisaun Off-Road Timor-Leste no NTT ne’e espera bele sai plataforma ida atu promove desportu motorsport, troka esperiénsia, kultura no hametin liután relasaun amizade entre Timor-Leste no Nusa Tenggara Timur.
Reportajen: Octaviana da Costa
Foto: Macho