Díli, 11 Setembru 2026 (Média Democracia) – Sarani sira husi parokia oin-oin iha Dioseze Díli, Maliana no Baucau, ho fiar no devosaun, partisipa iha Misa Funebre ba restus mortais preladus Katóliku na’in-haat, ne’ebé hala’o iha Esplanada Tasi-Tolu, Kinta-feira (10/09).
Preladus Katóliku na’in-haat ne’e mak Dom Jaime Garcia Goulart, Bispu dahuluk ba Dioseze Díli (1.º Bispu Díli); Dom José Joaquim Ribeiro, Bispu daruak ba Dioseze Díli (2.º Bispu Díli); Monseñor Martinho da Costa Lopes, Administradór Apostóliku ba Dioseze Díli; no Dom Alberto Ricardo da Silva, Bispu Dioseze Díli durante períodu 2004–2015.
Partisipasaun sarani Katóliku sira husi munisípiu oin-oin iha Misa Funebre ba preladus na’in-haat ne’e, hatudu sira-nia domin, respeitu no fiar ba lider relijiozu sira ne’ebé durante sira-nia moris no servisu pastorál, tau Timor-Leste iha sira-nia fuan no akompaña povu iha prosesu luta ba ukun-rasik-an.
Sarani António Bento Correia, husi Parokia Vila Santo António Baucau, Dioseze Baucau, hatete katak nia mai hamutuk ho parokianu sira atu partisipa iha selebrasaun Misa no fó omenajen ba preladus Katóliku na’in-haat.
“OHIN ami mai hamutuk ho sarani hotu atu tuir selebrasaun ba ita-nia preladus na’in-haat, ne’ebé ohin atu hakoi no lori sira-nia restus mortais ba Igreja Katedral. Ami mai hamutuk ho ami-nia parokianu tomak. Parokia organiza kareta sira ne’ebé oferese husi sarani ida-idak, no mós hetan apoiu husi paroku atu lori ami mai. Ami sai husi Baucau meiudia, tanba informasaun ne’ebé ami hetan mak atu tama iha Tasi-Tolu tuku tolu, no ami to’o ona iha ne’e,” António Bento Correia hatete ba jornalista sira iha Tasi-Tolu, Kinta-feira (10/09).
António dehan katak, nu’udar sarani, nia sente sentimentu boot no konsidera importante atu fó omenajen ba “bibi atan” na’in-haat ne’ebé durante Timor-Leste seidauk ukun-rasik-an, sira haklaken Nai Maromak nia Liafuan no Evanjellu iha Timor-Leste.
“Ida ne’e mak buat ne’ebé halo ita sempre tau iha ita-nia memória katak, nu’udar sarani Katóliku, ita iha bibi atan ne’ebé iha valór boot. Maski ita enfrenta situasaun difísil, sira nunka husik ita. Sira sempre akompaña ita ho orasaun no vizita ba povu no sarani sira,” António haktuir.
Nia dehan katak, tanba ne’e, sentimentu nu’udar sarani mak atu nafatin tuir no valoriza bibi atan sira ne’ebé sira husik ona mundu ida-ne’e, maibé sira-nia kontribuisaun sei kontinua moris iha Igreja Katóliku no iha memória povu Timor-Leste.
Iha fatin hanesan, Sarani Agusta da Silva, husi Parokia Bekora, mós mai hamutuk ho nia família atu tuir Misa iha Tasi-Tolu no fó omenajen ba preladus Katóliku na’in-haat.
“Ha’u-nia sentimentu boot tebes tanba sira-nia luta ba nasaun Timor-Leste ida-ne’e, ne’ebé ohin hetan ona ukun-rasik-an. Sira mós halo buat barak ba nasaun ida-ne’e, ne’ebé halo ha’u sente katak ami tenke hato’o agradese. Iha tempu avó sira nian, loron ruma sira halo buat ruma ne’ebé bele halo kanek iha sira-nia laran. Tanba ne’e, ami husu deskulpa no hato’o pedidu perdua,” Agusta da Silva hatete.
Nia dehan katak, ba jerasaun sira iha futuru, sira bele hetan buat ne’ebé di’ak liután no moris iha situasaun ne’ebé furak liután. Tanba ne’e, sarani sira mai partisipa iha Misa iha Tasi-Tolu atu hato’o agradese no husu deskulpa ba buat hotu ne’ebé akontese durante tempu liubá.
Tuir observasaun Média Democracia iha fatin, durante Misa Solene ba preladus na’in-haat ne’e, ekipa seguransa husi PNTL, F-FDTL no Eskuteiru sira asegura situasaun seguransa to’o Misa remata. Depois, prosesu translasaun restus mortais preladus na’in-haat ba Sé Katedral Díli hala’o tuir serimónia funebre no remata ho susesu.
Reportajen: Octaviana da Costa
Foto : Octaviana da Costa