Díli, 15 Setembru 2026 (Média Democracia) – Prezidente Komisaun Júri Rekrutamentu Kandidatu Membru PNTL Foun Tinan 2026, Komisáriu Asisténte Polísia José Soares, informa katak Ministru Interiór, Francisco Guterres, autoriza ona Komandu PNTL, liuhusi Komisaun Rekrutamentu, atu públika lista naran kandidatu sira ne’ebé admitidu ba faze reverifikasaun dokumentu.
Total kandidatu ne’ebé admitidu ba faze reverifikasaun dokumentu hamutuk 12.877.
“Instrusaun husi Ministériu Interiór mak tenke públika ona rezultadu. Kumpre ba orientasaun ida-ne’e, hahú husi aban, ita sei entrega rezultadu reverifikasaun dokumentu ba Jornál da República, ba kandidatu ho total 12.877,” dehan Komisáriu Asisténte Polísia José Soares ba jornalista sira iha konferénsia imprensa ne’ebé hala’o iha Kuartel Jerál PNTL, Caicoli, tersa-feira (15/09).
Nia hateten katak, númeru kandidatu ne’ebé komisaun anterior públika antes hamutuk 12.874, maibé iha reverifikasaun foun ne’e aumenta ba 12.877, tanba komisaun hetan tan dokumentu tolu iha gaveta no armáriu Sekretariadu.
“Dokumentu tolu ita hetan iha gaveta Sekretariadu, iha númeru anterior 12.874, maibé númeru aumenta tanba ita hetan dokumentu balun iha armáriu no gaveta. Tanba ne’e, númeru kandidatu aumenta sai 12.877,” nia informa.
Komisaun Rekrutamentu hahú ona, iha tersa-feira (15/09), imprime rezultadu lista reverifikasaun dokumentu kandidatu membru PNTL foun 2026. Rezultadu ne’e sei públika iha Jornál da República hahú kuarta-feira (16/09).
Iha semana ida-ne’e nia laran, Komandu PNTL liuhusi Komisaun Rekrutamentu sei mós públika lista ne’e iha Komandu Munisípiu sira no Sentru Formasaun Polísia, atu kandidatu sira bele haree sira-nia naran.
Prezidente Komisaun Júri hateten katak kandidatu ne’ebé prienxe kritériu sei admite atu kontinua ba faze prova kulturál, enkuantu kandidatu ne’ebé la prienxe kritériu sei hetan sira-nia naran iha lista rezultadu.
“Balun sira ne’ebé prienxe kritériu, prienxe duni; balun ne’ebé la prienxe kritériu, la prienxe. Tanba ita tenke promove meritu, tenke garante transparénsia no komprimisu atu halo servisu tuir loos,” hatete nia.
Nia dehan, komisaun sei fó loron lima ba kandidatu sira atu verifika sira-nia naran iha Komandu Munisípiu no Sentru Formasaun Polísia. Hafoin períodu ida-ne’e, komisaun sei kontinua ba faze prova kulturál.
“Rezultadu ne’ebé Sekretariadu halo, ita kaer metin ba prinsipiu sira ne’ebé hakerek iha Diploma Ministeriál Númeru 35/2026, ne’ebé ko’alia kona-ba meritu, transparénsia, akontabilidade no kredibilidade,” nia dehan.
Komisáriu Asisténte Polísia José Soares mós afirma katak membru Sekretariadu no Júri sira halo sira-nia servisu ho komprimisu ba povu no erói sira ne’ebé mate ba rai Timor-Leste, no compromete atu kumpre Konstituisaun no lei.
Nia hateten katak, durante prosesu ne’e, la iha individu ida ne’ebé intervén iha servisu Sekretariadu ka Júri.
Júri ne’ebé partisipa iha prosesu rekrutamentu ne’e kompostu husi membru GNR internasionál na’in rua, TLPDP na’in rua, PNTL na’in rua no membru husi Komisaun Funsaun Públika.
Komisáriu José Soares aproveita mós atu apela ba kandidatu sira hotu ne’ebé prienxe rekezitu, atu haree sira-nia naran iha lista rezultadu.
“Ami sei fó loron lima no públika rezultadu iha Jornál da República, iha munisípiu sira no iha Sentru Formasaun, atu fó biban ba kandidatu sira atu haree sira-nia naran. Karik iha buat ruma ne’ebé la loos, sira bele halo reklamasaun,” nia afirma.
Tuir Komisáriu José Soares, durante prosesu reverifikasaun dokumentu, komisaun identifika katak kandidatu rihun resin ida iha dokumentu la kompletu. Aleinde ne’e, iha kandidatu balun ne’ebé idade liu ona 24 tinan, balun ho nivel edukasaun SMP, no balun la’ós sidadaun Timor-Leste. Informasaun kona-ba kandidatu sira ne’e sei mós inklui iha rezultadu ne’ebé públika.
Nia husu ba Provedoria dos Direitos Humanos e Justiça (PDHJ), organizasaun naun-governamentál (NGO) no autoridade sira seluk atu akompaña no haree prosesu rekrutamentu ne’e, hodi asegura katak servisu Sekretariadu no Júri hala’o tuir lei.
“Ha’u husu ba PDHJ, NGO no autoridade sira seluk atu akompaña ami-nia enkontru no servisu, hodi haree katak ami-nia servisu lao tuir lei ka lae, nune’e bele asegura funsionamentu Sekretariadu ida-ne’e lao ho di’ak,” nia dehan.
Iha parte ikus, Komisáriu José Soares reafirma nia komprimisu ba povu Timor-Leste tomak atu hala’o prosesu rekrutamentu ho transparénsia no tuir lei.
Jornalista: Estefánia Cardoso
Foto: Estefánia Cardoso