Díli, 15 Setembru 2026 (Média Democracia) – Komunidade ne’ebé sei afeita hosi projetu konstrusaun Estádiu São João Paulo II, Tasi-Tolu, Joanico Sebastião da Costa, husu Governu liuhusi Ministériu Edukasaun atu kria mekanizmu ida ba estudante sira ne’ebé hela no eskola iha área ne’ebé sei afeita hosi projetu ne’e, nune’e sira bele kontinua asesu ba edukasaun no la hetan impaktu negativu hosi prosesu mudansa.
“Ami husu ba Governu, liuhusi Ministériu Edukasaun, atu buka mekanizmu atu trata estudante ki’ik sira ne’ebé eskola iha área Tasi-Tolu, maibé sei afeita hosi projetu ne’e, atu sira bele muda ho dignidade no labele hetan presaun,” dehan Joanico iha intervensaun durante diálogu ne’ebé hala’o iha Sede MBX, Tasi-Tolu, tersa-feira (15/09).
Preokupasaun ne’e hato’o relasiona ho prosesu konstrusaun estádiu foun ho padraun internasionál no kampu futsal indoor iha área Tasi-Tolu. Komunidade afeita husu ba Governu, liuliu Ministériu Edukasaun, atu kria mekanizmu ne’ebé bele garante estudante sira ne’ebé hela iha área afetada kontinua hetan sira nia direitu ba edukasaun.
Joanico prefere ba Governu atu, bainhira prosesu eviksaun hala’o, kria uluk fatin provizóriu ne’ebé seguru ba labarik sira, nune’e prosesu mudansa labele interrompe sira nia tempu eskola. Tuir nia, se Governu muda komunidade husi área ne’ebé sei uza ba konstrusaun estádiu, labarik sira mós bele presiza muda eskola.
Enkuantu ne’e, Sekretáriu Estadu Terras no Propriedade, Jaime Xavier Lopes, hateten katak ekipa konjunta sei halo identifikasaun ba estudante sira ne’ebé hela iha área ne’ebé sei afeita hosi projetu ne’e.
“Ami sei halo identifikasaun, labarik sira iha uma ida-ne’e eskola iha ne’ebé no iha uma ida-ne’ebá eskola iha ne’ebé, nune’e bele garante sira kontinua tuir prosesu aprendizajen,” nia dehan.
Nia afirma katak sei kordena ho Ministériu Edukasaun atu haree no trata asuntu ne’e, nune’e bele fasilita estudante sira, inklui sira ne’ebé karik presiza muda ba munisípiu seluk.
“Tanba ne’e, ha’u dehan, Timor atu ba oin presiza edukasaun. Entaun, ba estudante universidade sira, bele buka fatin seluk atu sira bele hela no kontinua estudu. Maibé, liuliu ba labarik sira iha ensinu báziku, ida-ne’e mak ita sei buka mekanizmu ruma. Se sira muda, ita sei husu Ministériu Edukasaun atu fasilita,” nia konklui.
Jornalista: Estefánia Cardoso
Foto: Estefánia Cardoso