Díli, 16 Setembru 2026 (Média Democracia) – Komunidade afetadu sira iha Aldeia 12 de Outubru, Suku Comoro, Postu Administrativu Dom Aleixo, Munisípiu Díli, prontu atu kontribui liuhusi disponibiliza rai hodi suporta implementasaun projetu konstrusaun Estádiu ho Padraun Internasionál no Kampu Futsal Indoor.
Maski nune’e, komunidade husu ba Governu atu garante prosesu relokasaun no kompensasaun ne’ebé konsidera sira nia direitu no dignidade.
Reprezentante Komunidade Aldeia 12 de Outubru Tasi-Tolu, Francisco Lopes da Silva, hatete katak komunidade iha aldeia ne’e prontu atu apoia programa dezenvolvimentu, maibé husu ba Governu atu garante katak komunidade sira ne’ebé sei reloka ba fatin seluk bele sai ho dignidade.
“Ami husu levantamentu dadus ida-ne’e labele kahur ho polítika, maibé ami husu atu dignifika komunidade sira. Se ita nia komunidade tenke sai husi ne’e no fila ba munisípiu ka ba foho, ami hakarak atu fila ho dignidade,” dehan Francisco, iha dialogu ho komunidade iha Uma MBX, Tasi-Tolu, tersa-feira (15/09).
Nia mós husu ba Governu atu, bainhira hala’o prosesu levantamentu dadus kona-ba rai no uma, halo ho klaridade no konsiderasaun ba situasaun no nesesidade komunidade nian.
“Ami la kontra programa Primeiru-Ministru nian, ami mós apoia, maibé prosesu ida-ne’e tenke lao di’ak, no importante liu mak konsidera komunidade,” nia afirma.
Tanba ne’e, Francisco husu ba Governu no autoridade munisipál atu tau prioridade ba nesesidade komunidade, inklui asesu ba transporte no fasilidade sira bainhira komunidade hakarak fila ba munisípiu ka ba fatin seluk.
“Ami la hakarak impede dezenvolvimentu, maibé atendimentu ba komunidade tenke ho dignidade. Karik ami mai husi munisípiu ida no hakarak fila ba ne’ebá, tenke atende ami ho dignidade. Tanba orsamentu ne’ebé ita boot sira fó ki’ik, entaun tenke iha apoiu transporte atu tula ami nia sasan to’o ba munisípiu,” nia salienta.
Iha biban hanesan, Xefe Bairo João Paulo II Tasi-Tolu, Marçal da Silva Martins, hatete katak komunidade Tasi-Tolu hein ona kleur, la’ós foin agora, maibé prosesu relokasaun tenke bazeia ba dadus husi ekipa téknika ne’ebé hala’o levantamentu durante tinan rua liubá.
“Ohin esplikasaun husi SETP halo ami, komunidade Tasi-Tolu, kontente. Maibé ami lakohi esperiénsia sira ne’ebé akontese iha fatin seluk akontese mós iha ne’e, hodi hasai ita nia komunidade la ho dignidade. Ami hakarak ita dignifika komunidade sira atu fila ba fatin ne’ebé de’it ho dignidade,” nia dehan.
Iha biban ne’e, Sekretáriu Estadu Terras no Propriedade, Jaime Xavier Lopes, hatete katak ekipa konjunta sei hala’o re-levantamentu atu klarifika ho loos dadus sira ne’ebé iha, hodi nune’e prosesu ba kalkulasaun kompensasaun bele lao ho klaridade.
“Tanba ne’e, ita sei halo re-levantamentu atu identifika ho loos dadus sira ne’e, nune’e prosesu ba kontajen indemin izasaun bele sai klaru,” nia afirma.
Nia esplika katak prosesu sei hala’o tuir lei. Bainhira to’o ona tempu, ekipa konjunta sei haruka karta notifikasaun, nune’e família sira hotu bele prepara no muda ho dignidade.
“Ba inan-aman sira hotu, prosesu hotu ita lao tuir regra. Tanba ne’e, osan ba indemnizasaun sei iha, maibé dadus hotu tenke tama uluk ba prosesu. Bainhira osan tama ona iha imi nia konta bankária, imi tenke prepara an ona atu muda,” nia informa.
Nia afirma katak Governu sei trata komunidade sira ho dignidade, tanba rai ne’e propriedade Estadu nian. Tanba ne’e, bainhira Governu presiza uza rai ne’e, sei halo levantamentu dadus atu fasilita família sira ne’ebé sei reloka ba munisípiu ka ba fatin seluk.
Jornalista: Estefánia Cardoso
Foto: Estefánia Cardoso