Díli, 17 Setembru 2026 (Media Democracia) – Diretór Ezekutivu Servisu Imigrasaun, Komisáriu Asistente Polísia Jorge Monteiro, hatete katak sidadaun estranjeiru hamutuk 282.304 tama iha territóriu Timor-Leste durante períodu husi Janeiru to’o Agostu 2026, no maioria uza vistu turista.
“Iha sidadaun estranjeiru balu ne’ebé uza vistu turista ho objetivu atu halo atividade turístika, maibé iha pratika sira halo atividade seluk, inklui atividade negósiu no servisu, ne’ebé la tuir kondisaun vistu ne’ebé sira hetan,” dehan Diretór Ezekutivu Servisu Imigrasaun ba jornalista sira iha nia fatin servisu, Ministériu Interiór, Kinta-feira (17/09).
Jorge Monteiro dehan, relasiona ho kazu hirak-ne’e, Servisu Imigrasaun kontinua hala’o fiskalizasaun no aplika prosedimentu tuir Lei Imigrasaun, inklui sansaun administrativa ba violasaun kondisaun vistu.
Nia informa, husi Janeiru to’o Agostu 2026, Servisu Imigrasaun rejista sidadaun estranjeiru hamutuk 311 ne’ebé viola kondisaun vistu, liuliu sira ne’ebé tama ho vistu turista, maibé hala’o atividade servisu ka negósiu.
“Ba violasaun sira-ne’e, autoridade imigrasaun bele aplika multa tuir gravidade no kondisaun kazu. Valor multa ba violasaun vistu varia entre US$200 to’o US$540, tuir dispozisaun Lei Imigrasaun,” nia informa.
Ba sidadaun estranjeiru ne’ebé iha kapasidade atu selu multa, sira tenke kumpre obrigasaun administrativa ne’ebé determina husi autoridade kompetente.
Enkuantu ba sira ne’ebé la iha kapasidade ka possibilidade atu selu multa, Servisu Imigrasaun bele aplika medida abandona voluntariamente territóriu nasionál Timor-Leste, tuir prosedimentu legal ne’ebé vigora.
Nia hatete, ba sidadaun estranjeiru ne’ebé viola kondisaun vistu, Servisu Imigrasaun aplika sansaun la’ós de’it ba individu, maibé mós ba kompañia ka entidade ne’ebé lori ka transporta sidadaun estranjeiru tama iha Timor-Leste atu hala’o atividade servisu ho uza vistu turista.
“Ba sidadaun estranjeiru ne’ebé uza vistu turista, maibé hala’o atividade servisu, multa ne’ebé aplika ba individu varia entre US$200 to’o US$540, tuir dispozisaun Lei Imigrasaun no gravidade violasaun,” nia afirma.
Enkuantu, individu ka kompañia ne’ebé transporta ka lori sidadaun estranjeiru mai Timor-Leste atu hala’o atividade servisu ho vistu turista, sei hetan sansaun ho multa entre US$750 to’o US$1.500.
Medida ne’e bele aplika ba entidade ka negósiu oioin, inklui karaoke, kompañia konstrusaun ka entidade seluk ne’ebé lori sidadaun estranjeiru mai Timor-Leste atu hala’o atividade servisu, maibé sidadaun estranjeiru refere uza vistu turista.
Monteiro subliña sansaun ne’e aplika ba sidadaun estranjeiru ne’ebé viola kondisaun vistu, no mós ba individu ka kompañia ne’ebé lori ka transporta sira tama iha Timor-Leste atu hala’o atividade servisu.
Aleinde ne’e, Servisu Imigrasaun mós aplika sansaun ba kompañia lokal no kompañia estranjeira ne’ebé lori traballadór estranjeiru hosi liur tama iha territóriu nasionál Timor-Leste ho vistu turista, maibé depois emprega sira atu hala’o atividade servisu.
“Husi Janeiru to’o Agostu tinan ne’e, Servisu Imigrasaun aplika ona sansaun ba kompañia hamutuk 9, inklui entidade ne’ebé hala’o atividade negósiu hanesan karaoke, bar no atividade konstrusaun,” nia dehan.
Sansaun ne’e aplika ba traballadór estranjeiru ne’ebé viola kondisaun vistu, no mós ba kompañia ka entidade ne’ebé lori ka transporta traballadór estranjeiru tama iha Timor-Leste ho vistu turista, maibé emprega sira atu hala’o atividade servisu.
Diretór Ezekutivu Servisu Imigrasaun hatete, medida ne’e la’ós de’it aplika ba traballadór estranjeiru, maibé mós ba empregadór ka entidade ne’ebé fasilita entrada no empregu traballadór estranjeiru la tuir kondisaun legal.
Jornalista: Estefánia Cardoso
Foto: Estefánia Cardoso