Díli, 17 Setembru 2026 (Media Democracia) – Relasiona ho kazu suspeita burla informátika, Servisu Imigrasaun simu ona orden hosi Tribunal Judisiál Primeira Instánsia Díli (TJPID) atu kontrola no bandu sidadaun estranjeiru hamutuk 132 ne’ebé suspeita envolvimentu iha kazu kriminal hirak-ne’e, atu labele sai husi territóriu nasionál Timor-Leste.
Husi total sidadaun estranjeiru 132 ne’ebé hetan orden husi tribunal, sidadaun husi Repúblika Populár Xina hamutuk 75, enkuantu husi Repúblika Indonézia hamutuk 53.
Diretór Ezekutivu Servisu Imigrasaun, Komisáriu Asistente Polísia Jorge Monteiro, hatete orden ne’e simu hosi Tribunal Judisiál Primeira Instánsia Díli atu kontrola sidadaun estranjeiru hirak-ne’e no bandu sira atu labele sai hosi territóriu nasionál, tanba iha indísiu katak sira suspeitu komete krime grave.
“Relasiona ho suspeitu sira ne’ebé iha suspeita ba kazu burla informátika, Servisu Imigrasaun simu orden husi Tribunal Judisiál Primeira Instánsia Díli. Ita simu orden tribunal hodi bandu sidadaun estranjeiru sira labele sai husi territóriu nasionál Timor-Leste. Sidadaun estranjeiru husi Repúblika Populár Xina hamutuk 75 no husi Repúblika Indonézia hamutuk 53. Total orden ne’ebé tribunal hasai hamutuk 132,” dehan Jorge Monteiro ba jornalista sira iha Ministériu Interiór, Kinta-feira (17/09).
Nia hatete orden ne’e fó autoridade ba Servisu Imigrasaun atu kontrola no bandu sidadaun estranjeiru hirak-ne’e atu labele sai hosi territóriu nasionál, tanba sira sei iha prosesu judisiál.
Diretór Ezekutivu Servisu Imigrasaun subliña, tuir orden ne’ebé simu hosi Tribunal Judisiál Primeira Instánsia Díli, sidadaun estranjeiru hirak-ne’e sei kontinua hetan kontrolu no bandu atu labele sai hosi territóriu nasionál durante prosesu judisiál sei la’o.
Reportajen: Pedrito dos Santos
Foto: Estefánia Cardoso