Dili, 30 Outubru 2026 (Média Democracia) – Direksaun Nasionál Seguransa Rodoviária (DNSR), iha Ministériu Interior, apela ba komunidade tomak atu utiliza estrada públika tuir regra no regulamentu tránzitu ne’ebé vigora, hodi prevene asidente trafiku, liuliu durante períodu movimentu ema ne’ebé aumenta ba munisípiu sira.
Diretór Nasionál Seguransa Rodoviária, Elder Soares, afirma atividade sosializasaun ne’e hala’o durante fulan ida nia laran, ho objetivu atu fó informasaun no konsiénsia ba komunidade iha territóriu tomak kona-ba importánsia uza estrada públika ho responsabilidade no tuir regra tránzitu.
“Objetivu husi atividade ne’e mak atu kontinua fó hanoin ba komunidade iha territóriu tomak, liuliu tanba besik ona loron boot sira, ne’ebé sei aumenta movimentu ema ba munisípiu barak. Tanba ne’e, ami iha responsabilidade atu fó hanoin ba komunidade sira atu utiliza estrada públika tuir regra, nune’e bele evita asidente durante sira nia viajen,” nia afirma.
Elder Soares hatutan DNSR mós apela espesifikamente ba motorista sira, liuliu kondutór autobús, atu kumpre regra kona-ba limite pasajeiru, no la tula pasajeiru liu kapasidade veíkulu nian, tanba prátika ne’e bele aumenta risku asidente trafiku.
“Ami kontinua fó atensaun ba autobús sira, tanba dala barak iha autobús balun ne’ebé tula pasajeiru liu kapasidade, to’o pasajeiru balun hamriik iha odamatan. Tanba ne’e, ami presiza fó hatene ba kondutór sira katak pasajeiru tenke tuir kapasidade autobús nian, atu evita asidente. Se la kumpre regra ne’e, sei hetan sansaun husi Polísia Tránzitu,” nia esplika.
Iha atividade sosializasaun ne’ebé DNSR hamutuk ho Polísia Tránzitu hala’o iha área husi Elemloi, Terminal Tasi-Tolu no Terminal Becora, Polísia Tránzitu konsege prende motór tolu ne’ebé viola regra tránzitu. Autoridade sira asegura katak kazu hirak ne’e sei tuir prosesu ne’ebé regula iha Kódigu Estrada.
Entretantu, DNSR sei kontinua hala’o atividade sosializasaun iha munisípiu no postu administrativu sira iha territóriu Timor-Leste tomak, hodi aumenta konsiénsia públika kona-ba seguransa rodoviária no kontribui ba redusaun asidente trafiku.
Reportajen: Ekipa