HNGV Sei Halo Autópsia ba Kadáver Palomita Tuku 2 Lokraik

Dili, 19 Novembru 2026 (Média Democracia) – Hospital Nasionál Guido Valadares (HNGV) sei realiza prosesu autópsia ba kadáver Palomita Gusmão Guterres, vítima husi kazu omisídiu ne’ebé akontese iha Tasi-Tolu, Aldeia 12 Outubru, Suku Komoro, Postu Administrativu Dom Aleixo, Munisípiu Dili, iha kuarta-feira (18/11/2026), besik tuku tolu lokraik. Prosesu autópsia ne’e sei hala’o iha tuku rua lokraik, molok entrega kadáver ba família atu kontinua prosesu funerál.

Xefe Departamentu Forénsik HNGV, Nilton Tilma, hateten  autópsia ne’e importante tebes atu determina kauza no natureza mate vítima nian, liuliu tanba kazu ne’e envolve krime violénsia grave ne’ebé atrai atensaun públika liuhusi mídia sosiál.

“Infelizmente, ita hasoru situasaun ne’ebé triste tebes, no difísil atu deskreve ho liafuan. Kazu krime ida ne’e ita hotu akompaña ona liuhusi mídia sosiál, ne’ebé sai viral no hetan atensaun maka’as husi públiku. Informasaun kona-ba kanek sira ne’ebé vítima hetan iha isin-lolon, kuaze 95% husi ema hotu-hotu hatene ona,” dehan Nilton Tilma ba jornalista sira iha HNGV, kinta-feira (19/11).

Nia hatutan, tuir sirkunstánsia no informasaun ne’ebé sira akompaña durante oras 24 nia laran, kazu ne’e konsidera grave tebes.

“Ita haree katak kazu ne’e grave no kruél tebes. Situasaun ida-ne’e akontese iha ema sira ne’ebé sei iha idade produtiva no sei iha futuru naruk. Sira mak sai parte importante ba futuru nasaun nian. Maibé, ho situasaun ne’ebé akontese ne’e, ita hotu la espera. Agora parte kompetente sira intervén ona no prosesu legal kontinua lao hela,” nia afirma.

Nilton esplika suspeitu iha kazu ne’e hela detidu iha sela polísia nian, enkuantu kadáver vítima nian hela iha sala mortuáriu HNGV atu hein prosesu autópsia.

Nia hatutan, tuir planu inisiál, autópsia tenke hala’o iha dadeer, maibé tanba natureza kanek no kondisaun kadáver nian, ekipa forénsik presiza hein tan atu prepara kadáver antes hahú prosesu autópsia.

“Autópsia ne’e tuir planu tenke hala’o ona iha dadeer, maibé tanba kazu ne’e grave tebes, ita fó tempu ba parte kompetente sira atu kontinua hala’o sira-nia servisu. Aleinde ne’e, tanba temperatura iha makina konjeladór nian malirin tebes, kadáver presiza hein tempu balu atu temperatura isin nian normal fali, nune’e bele hala’o prosesu autópsia,” nia esplika.

Xefe Departamentu Forénsik ne’e mós informa prosesu autópsia sei dura kuaze oras ida to’o rua. Hafoin prosesu ne’e remata, HNGV sei entrega kadáver ba família no prepara relatóriu rezultadu autópsia atu haruka ba Ministériu Públiku (MP), nune’e bele kontinua prosesu tuir lei ne’ebé vigora iha Timor-Leste.

“Hafoin autópsia remata, ita sei entrega kadáver ba família. Iha tempu hanesan, ita sei prepara rezultadu autópsia atu entrega ba Ministériu Públiku, nune’e bele kontinua prosesu tuir lei ne’ebé vigora iha ita-nia rai,” nia konklui.

Reportajen: Octaviana da Costa

Foto: Octaviana da Costa

Tinggalkan Balasan

Alamat email Anda tidak akan dipublikasikan. Ruas yang wajib ditandai *