Dili, 19 Novembru 2026 (Média Democracia) – Sekretária Estadu ba Igualdade (SEI), Elvina Souza Carvalho, hamutuk ho Diretora Ezekutiva Organizasaun Naun-Governamentál (ONG) Ba Futuru, Judith Maria de Sousa, ezije autoridade kompetente sira atu garante justisa no aplika kastigu tuir lei ba suspeitu ne’ebé deskonfia involve iha kazu omisídiu hasoru feto joven ida ho naran Palomita Gusmão Guterres, ne’ebé mate tanba violénsia ne’ebé akontese iha Aldeia 12 de Outubro, Suku Comoro, Postu Administrativu Dom Aleixo, iha Kuarta-Feira, 18 Novembru 2026, besik tuku 15:00 lokraik.
Relasiona ho kazu ne’e, Sekretária Estadu ba Igualdade, Elvina Souza Carvalho, afirma violénsia hasoru feto hanesan ne’e labele hetan toleránsia, no husu atu prosesu justisa lao tuir lei ne’ebé vigora iha Timor-Leste.
“Hau hanoin katak ita labele tolera aktu sira hanesan ne’e, atu nune’e bele prevene akontesimentu hanesan ne’e atu la akontese tan iha futuru. Buat importante liu mak tenke iha justisa ba matebian Palomita. Autor ne’e tenke hetan kastigu tuir lei ne’ebé vigora iha Timor-Leste,” SEI Elvina Souza Carvalho hateten ba jornalista sira iha Tower, Fatuhada, Kinta-Feira (19/11).
Governante ne’e mós apela ba feto no joven feto sira atu kuidadu an, hili parseiru ho kuidadu no buka apoiu bainhira hasoru situasaun ne’ebé ameasa sira-nia seguransa.
“Hau hakarak fó mensajen ba ita feto maluk sira atu kuidadu an no hili parseiru ho kuidadu. Violénsia ne’ebé akontese labele evita hotu, maibé ita bele prevene liuhusi hili parseiru ne’ebé di’ak. Bainhira ita sente katak ita la seguru, ita tenke ko’alia sai no buka apoiu, liuliu husi autoridade seguransa sira. Lei proteje ita, maibé ita mós tenke kuidadu no proteje ita-nia an,” nia hatutan.
Iha fatin hanesan, Diretora Ezekutiva ONG Ba Futuru, Judith Maria de Sousa, mós kondena aktu violénsia ne’e no afirma organizasaun ne’ebé nia lidera kontinua halo sensibilizasaun ba komunidade kona-ba violénsia bazeia ba jéneru, liuliu iha relasaun domin ne’ebé mane balu uza kontrolu ba feto sira-nia moris.
Nia subliña aktu violénsia ne’ebé hamosu vítima nia mate hanesan kazu Palomita labele hetan toleránsia, no tenke prosesa tuir dalan legal atu vítima no família bele hetan justisa.
“Organizasaun Naun-Governamentál Ba Futuru kontinua halo diseminasaun informasaun kona-ba asuntu sira ne’e, liuliu kona-ba relasaun domin ne’ebé foka ba kontrolu mane nian iha feto sira-nia moris. Aktu hanesan ne’e labele tolera no labele simu. Ida ne’e krime ida ne’ebé presiza justisa tuir dalan legal, atu nune’e ita-nia alin-feto Palomita bele hetan justisa,” Judith Maria de Sousa afirma.
Nia subliña aktu violénsia ne’ebé hamosu vítima nia mate hanesan kazu Palomita labele hetan toleránsia, no tenke prosesa tuir dalan legal atu vítima no família bele hetan justisa.
Reportajen: Pedrito/Tomas
Foto: Pedrito Dos Santos
