Mari Alkatiri: La Iha Justifikasaun ba Ema Ida Atu Oho Ema Seluk

Timor-Leste Independente (FRETILIN), Mari Alkatiri, afirma katak la iha razaun ka justifikasaun ruma ne’ebé bele permite ema ida atu hasai ema seluk nia vida, tanba Konstituisaun Repúblika Demokrátika Timor-Leste (K-RDTL) garante direitu fundamentál ba sidadaun hotu-hotu atu moris.

Alkatiri hato’o deklarasaun ne’e bainhira vizita no hato’o kondolénsia ba família matebian Palomita Gusmão Guterres, iha rezidénsia família nian, Matadouro, Kinta, iha loron 19 Novembru 2026.

Nia dehan luta no sakrifísiu husi mártir no eroin sira durante períodu rezisténsia atu hetan independénsia, tenke sai eransa ne’ebé haforsa povu Timor-Leste atu respeita no valoriza vida ema hotu-hotu.

“Konstituisaun dehan katak ema hotu-hotu iha direitu atu moris. La iha ema ida, ho razaun saida de’it, mak bele hasai ema seluk nia vida,” Alkatiri dehan.

Nia subliña kazu violénsia, liuliu violénsia ne’ebé viola dignidade feto nian, la’ós problema foun iha Timor-Leste. Tanba ne’e, nia husu lideransa polítika no komunidade tomak atu halo reflesaun kle’an kona-ba situasaun ne’e.

Alkatiri konsidera demokrasia labele sai realidade se feto no labarik-feto sira kontinua moris iha situasaun ne’ebé la garante sira-nia seguransa no direitu atu moris ho livre no dignidade.

“Saida mak demokrasia bainhira ita-nia oan sira, liuliu oan-feto sira, la iha seguransa no garantia katak sira bele fila ba uma ho seguru?” nia husu.

Nune’e, Sekretáriu-Jerál FRETILIN ne’e dezafia lideransa polítika hotu-hotu, inklui líder partidu polítiku sira no ema ne’ebé iha interese atu kandidatu ba kargu Prezidente Repúblika, atu fó atensaun sériu ba problema violénsia ne’ebé kontinua akontese iha sosiedade.

Nia mós apela ba família no komunidade atu hahú husi uma-kain rasik, liuhusi edukasaun ba labarik sira, liuliu labarik-mane sira, atu aprende respeita feto no valoriza sira-nia dignidade no direitu.

“Tempu ona atu halo reflesaun kle’an, husi kraik to’o leten no husi leten ba kraik, atu hapara violénsia sira ne’e. Tempu ona atu eduka ita-nia oan sira, liuliu oan-mane sira, atu respeita ita-nia alin-feto sira,” nia dehan.

Alkatiri afirma FRETILIN sei kontinua mobiliza lideransa no partidu polítiku sira atu hametin onestidade no responsabilidade, hodi halo avaliasaun ba rezultadu husi tinan 24 restaurasaun independénsia no buka dalan atu prevene krime no violénsia iha futuru.

Nia enfatiza tan katak kazu violénsia hanesan ne’e la’ós akontesimentu úniku, tanba violénsia kontinua akontese iha sosiedade. Maibé, situasaun ne’e labele sai buat ne’ebé komunidade simu ka konsidera nu’udar buat normal.

Iha momentu ne’e, Alkatiri hateten nia vizita família matebian la’ós de’it atu hato’o solidariedade no kondolénsia, maibé mós atu apela ba povu tomak atu hamutuk rejeita krime no violénsia, no hametin liberdade, respeitu ba vida ema hotu-hotu, liuliu dignidade feto no labarik-feto sira.

Reportajen: Octaviana da Costa

Foto: Octaviana da Costa

Tinggalkan Balasan

Alamat email Anda tidak akan dipublikasikan. Ruas yang wajib ditandai *