Díli, 18 Setembru 2026 (Média Democracia) – Kandidata Kadetes Foun Polísia Nasionál Timor-Leste (PNTL) tinan 2025, husi Munisípiu Díli, Jeniva Gusmão Pinto, lamenta kona-ba atendimentu Komisaun Rekrutamentu PNTL, tanba diploma universidade orijinál ne’ebé nia entrega ba komisaun anterior, deskonfia lakon.
“Uluk ha’u enfrenta problema ho dokumentu balu, maibé iha momentu ne’ebá ha’u kompleta kedas dokumentus sira. Agora problema prinsipál mak diploma orijinál Ensinu Superiór. Iha momentu ne’ebá, komisaun husu dokumentu orijinál no ha’u rasik mak entrega. Maibé agora, bainhira ha’u tama ba prosesu reverifikasaun dokumentus, diploma orijinál Ensinu Superiór la iha. Ha’u husu no konfronta sira iha laran, maibé sira dehan la hetan no haruka ha’u atu konfirma ho komisaun anterior,” dehan Jeniva Gusmão Pinto ba jornalista sira iha Akademia Comoro, Sesta (18/09).
Nia esplika katak diploma orijinál no dokumentu legalizadu sira entrega hotu ba Komisaun Rekrutamentu Kadetes Foun PNTL 2025 iha momentu reklamasaun no verifikasaun dokumentus iha sekretariadu komisaun.
Jeniva husu ba Komisaun Rekrutamentu PNTL atu fó klarifikasaun no buka solusaun ba problema ne’e, tanba nia afirma katak dokumentus hotu-hotu ne’ebé komisaun presiza, inklui diploma orijinál, nia entrega ona.
Enkuantu ne’e, kandidatu Kadetes Foun PNTL seluk, Arsenio Barbara Malik, husi Munisípiu Manufahi, mos la satisfás ho lista kandidatu ne’ebé PNTL publika, tanba nia konsidera prosesu ne’e bele hamosu dúvida kona-ba justisa no transparénsia.
Arsenio konsidera situasaun ne’e hamosu konfusaun ba kandidatu sira, tanba iha momentu uluk sira simu orientasaun husi komisaun atu kompleta dokumentus ne’ebé seidauk kompletu. Kandidatu sira halo ona tuir orientasaun ne’e, maibé iha lista reverifikasaun dokumentus ne’ebé foin sai, naran kandidatu balu la tama.
Nia husu ba komisaun atu fó klarifikasaun kona-ba razaun ne’ebé halo kandidatu balu la-admitidu ba prosesu reverifikasaun dokumentus, liuliu kandidatu sira ne’ebé afirma katak sira kompleta ona dokumentus tuir orientasaun komisaun.
“Ida-ne’e mak sai problema boot ba ami. Ami hakarak hatene tanba saida dokumentus ne’ebé ami kompleta ona, maibé ami nia naran la tama iha lista,” dehan Arsenio.
Arsenio mos esplika katak, iha momentu uluk, dokumentus balu ne’ebé seidauk kompletu sira kompleta kedas, inklui dokumentus orijinál ne’ebé presiza legalizasaun.
“Komisaun husu ami atu kompleta dokumentus. Ami halo ona no entrega dokumentus orijinál ne’ebé presiza legalizasaun. Maibé ikusmai, ami nia naran la iha iha lista,” nia hato’o.
Nia konsidera katak kandidatu sira ne’ebé uluk tama ona iha lista tenke hetan konsiderasaun iha prosesu reverifikasaun, liuliu sira ne’ebé kompleta ona dokumentus tuir orientasaun Komisaun Rekrutamentu.
“Komisaun husu ami atu kompleta dokumentus, no ami halo ona. Tanba ne’e, ami hakarak hatene razaun klaru tanba saida ami nia naran sei la tama iha lista reverifikasaun,” nia dehan.
Komisaun Rekrutamentu PNTL antes ne’e informa katak prosesu reverifikasaun dokumentus kandidatu sira hala’o bazeia ba regulamentu foun, no lista ne’ebé publika sei hatudu razaun ba kandidatu sira ne’ebé admitidu no la-admitidu.
Reportajen: Octaviana da Costa
Foto: Estefania